रुकुम पश्चिमको मुसिकोट नगरपालिका वडा नम्बर २ समिबोटमा निःशुल्क आँखा जाँच कार्यक्रम संचालन गरिएको छ । मुसिकोट खलंगाको आँखा स्वास्थ्य तथा चस्मा घरको सहयोग र महाकाली मावि समिबोटको पहलमा निःशुल्क आँखा जाँच गरिएको हो । 

९४ जनाको आँखा जाँच गरिएकामा ६० जना महिला र ३४ जना पुरुष रहेको दृष्टि विशेषज्ञ मन्दिप गौतमले जानकारी दिनुभयो । जसमध्ये ४० जनामा मोतिबिन्दु, २० जनामा दृष्टि दोष, २ जना विद्यार्थीमा जलबिन्दु र १ जनामा डेढोपनको समस्या भेटिएको उहाँले बताउनुभयो । 

समस्या भएकाहरुलाई औषधी निःशुल्क रुपमा र चश्मा सशुल्क रुपमा उपलब्ध गराइएको बताइएको छ । आँखा जाँच दृष्टि विशिषज्ञ मन्दीप गौतम र नेत्र सहायक पुस्पा गौतमले गर्नुभएको थियो । कार्यक्रमको सहजिकरण विद्यालय व्यवस्थापन समितिका अध्यक्ष रमेश खड्काले गरेको आँखा स्वास्थ्य तथा चस्मा घरका संचालक महेन्द्र गौतमले जानकारी दिनुभयो ।