रुकुम पश्चिमको मुसिकोट नगरपालिका वडा नम्बर १० मा बालबालिकालाई भर्नाको निम्तो दिन घरदैलो अभियान थालिएको छ । वडाले घर घरमै पुगेर बालबालिकालाई विद्यालय भर्नाको निम्तो दिइरहेको छ । शतप्रतिशत बालबालिकालाई विद्यालय भर्ना गर्ने र अभिभावकलाई जिम्मेवार बनाउने उदे्श्यले घरदैलो थालिएको वडाध्यक्ष धनबहादुर खड्का ‘बसन्त’ले जानकारी दिनुभयो । 

विद्यालय उमेर समुहका सबै बालबालिकालाई विद्यालयमा भर्ना गराउनका लागि जनप्रतिनिधि, शिक्षक, टोल विकास संस्था लगायतलाई परिचालन गरिएको उहाँले बताउनुभयो । टोलीले घरघरमा पुगेर बालबालिकालाई अनिवार्य रुपमा विद्यालय भर्ना गर्नका लागि निम्तो दिइरहेको छ । वडाका सबै टोलमा टोली पुग्ने वडाध्यक्ष खड्काले बताउनुभयो । 

उहाँका अनुसार विद्यालय उमेरका कोही पनि बालबालिका नछुटुन भन्ने उदे्श्य राखिएको छ । त्यस्तै अभिभभावकलाई जिम्मेवार बनाउन टाेलीले पहल गरिरहेकाे छ । बालबालिकालाई नियमित विद्यालय पठाउन, सरसफाई तथा पाेषणमा ध्यान दिन, गृहकार्य तथा घरमा पढ्ने वातावरण विकास गर्न, आफ्ना छाेरा छाेरीकाे पढाईमा ध्यान दिन, अभिभावक भेला लगायत विद्यालयका कार्यक्रममा चासाे दिन र सहभागी हुन अभभावकलाई सचेत बनाउने काम भइरहेकाे वडाध्यक्ष खड्काले बताउनुभयाे । 

अभिभावक जिम्मेवार नभएसम्म शैक्षिक सुधारमा टेवा नपुग्ने भएकाेले अभिभावकलाई जिम्मेवार बनाउने प्रयास भइरहेकाे बताइएकाे छ । अहिले वडाले दुई वटा टोली परिचालन गरेको छ । जिल्ला समन्वय समिति सदस्य मिना बिक, मालिका माध्यमिक विद्याललयका शिक्षक गोपाल खड्का, जोखबहादुर कठायत, शान्ति नमुना आधारभुत विद्यालयका प्रधानाध्यापक सीता खड्का लगायतको टोलीले कामी बुढा टोलमा शुक्रबार घरदैलाे गरेकाे छ । 

त्यस्तै अर्को टोली नमुना वस्तीमा खटिएको थियाे । उक्त टोलीमा वडा सदस्य अनिराम कठायत, मालिका माध्यमिक विद्यालयका शिक्षक मिना कठायत, कविता बिस्ट, नमुना टोल बिकास संस्थाका संयोजक शशिराम सुनार लगायत रहनुभएको छ । यि दुई टाेलीले भाेली आइतवार खड्का टोल र गलम्पाटी टोल र १२ गते राेल्पाकाे परिवर्तन गाउँपालिका ४ हलहले त्रिवेणी २ गैरीनेटामा घरदैलाे गर्ने छन् ।

वडाले शैक्षिक सुधार अभिबृद्धि योजना समेत निर्माण गरेको छ । अव सोही अनुसार वडाको शैक्षिक अभिबृद्धि विकासमा लाग्ने वडाध्यक्ष खड्काले बताउनुभयो ।