यो भिडिओ देख्दा तपाइलाई अचम्म लाग्नसक्छ । विश्वास गर्न तपाइलाई हम्मेहम्मे पर्ला । तर यि साना बालक विगत २ वर्ष देखि झाँक्रि बसिरहेका छन् । आङमा देउता चढेपछि आफुलाई केही थाहा नहुने र देउताले जे सिकाउँछ त्यही गर्ने गरेको उनि सुनाउँछन् । आज हामी तपाईलाई एउटा अनौठो क्षमता भएका बालकको कथा सुनाउँदै छौं । 

रुकुम पश्चिमको आठबीसकोट नगरपालिका ११ गोइरीका हरि शिर्पाली उमेरले १३ वर्ष पुग्दै छन् । उमेर अनुसार उनि यतिबेला आफ्नै उमेर समुहका साथीहरुसंग खेल्नुपर्ने हो । राम्ररी बुझ्नसक्ने परिपक्व उमेर भइसकेको छैन उनको । तर उनि यतिबेला झाँक्रि बस्न गाउँ गाउँ पुग्छन । राम्ररी घरमा बस्न पाउँदैनन् । एक ठाउँबाट झाँक्रि बसेर घर पुगेका हुँदैनन् उनलाई लिन अर्को गाउँका मान्छे आइपुगिसक्छन् । कतिपयले झाँक्रि बस्ने घरबाटै आफ्नो घर लिएर जान्छन । उनि उमेरले जति साना छन् उनिप्रति मान्छेको विश्वास अझ धेरै बढी छ । उनि झाँक्रि बस्यो भने बिरामीलाई सहजै निको हुने विश्वासमा टाढा टाढाबाट पनि उनलाई लिन मान्छेहरु पुग्छन् । रुकुम पश्चिमका धेरै ठाउँ पुगिसेका छन् हरि । यो बाहे छिमेकी जिल्लाहरुमा समेत झाँक्रि बस्न गइसकेको उनले सुनाए । 

विज्ञान र प्रविधिले ठूलो फड्को मारिसकेको छ । हरेक कुरा प्रविधिसंग जोडिएका छन् । तर धामि झाँक्रिमा विश्वास गर्नेहरुको कमि छैन् । हरि जस्ता अवोध बालकमा यस्तो शक्ति पैदा हुनुले पनि मान्छेहरुलाई धामी झाँक्रिप्रतिको विश्वास अझै बढाएको देखिन्छ । खेल्ने उमेरको एउटा कलिलो केटो आगोमै नाच्छ, आफ्नै भाषामा मन्त्र हान्छ, आँफुले सिके अनुसार बिरामीको उपचार गर्छ । उनकै शब्दमा उनले झाँक्रि बसेका धेरै बिरामी निको पनि भएका छन् रे । त्यसैले त उनिप्रतिको विश्वास अझ बढेको देखिन्छ । हुन पनि हो एउटा कलिलो केटो, जसले न धेरै पढेको छ, न धेरै बुझ्ने नै भएको छ । तर पनि हेर्नुहोस त उनलाई.....

विज्ञानले पुष्टी नगरेकोले धामी झाँक्रिलाई अन्धविश्वासका रुपमा लिइन्छ । तर पनि धामी झाँक्रिमा विश्वास अझै कम हुन सकेको छैन् । यदी भगवान झन भने भुत, प्रेत जस्ता नराम्रा शक्तिहरु पनि रहेको धेरैको तर्क रहने गरेको छ । जसले गर्दा विभिन्न अन्धविश्वासहरु बढ्दा छन् भने धामी झाँक्रिकै भर पर्दा धेरैले ज्यान समेत गुमाउन पुगेका छन् । तर यो भिडिओ देख्नुभयो भने तपाइलाई पनि धामी झाँक्रिमा विश्वास लाग्न सक्छ । कुनै शक्ति नभएको भए यो बालकमा यस्तो किन भयो ? आगोमा नाच्दा पनि किन पोल्दैन ? भन्ने यावत प्रश्नहरु तपाइको मनमा उब्जिन सक्छन् । हामीले यो भिडियो धामी झाँक्रिमा विश्वास गर्नुपर्छ वा गर्नुहुँदैन भन्ने बारेमा तपाइलाई सोध्न वा कुनै धारणा बनाउन बनाएका होइनौं । एक बालकमा रहेको अनौठौ प्रस्तुति तपाइका विचमा राख्नका लागि यो भिडिओ तयार पारिएको हो । 

हरि स्थानीय विद्यालयमा कक्षा ६ मा पढ्छन् । उनी २ वर्ष देखि झाँक्रि बस्दै आएका छन् । एक दिन अंकलको घरमा झाँक्रि बस्दै थिए । उनि त्यहाँ झाँक्रि हेर्न गएका थिए । उनकै शब्दमा उनलाई त्यही देउताले समाते । एकाएक के भयो मलाई थाहा छैन् पछि अरुले भने तलाई त देउताले छोए । त्यो दिनदेखि आफु झाँक्रि बस्न थालेको उनले सुनाए । आफुलाई देउताले छोएपछि बाँकी कुरा गुरुले सिकाएको उनको भनाई छ । झाँक्रि बस्दा आगोमा टेक्छौ, आगो छुन्छौ पोल्दैन भन्दा उनले भने मलाई केही थाहा हुन्न भित्रबाट जे सिकायो त्यही गर्ने हो त्यही बोल्ने हो । धामी झाँक्रिका सबै विधि उनलाई राम्ररी थाहा छ । उनले गररिहेको काम देख्दा कुनै तरिकाबाट बच्चा हो जस्तै लाग्दैन । 

हरि आफ्नो कामप्रति पूर्ण रुपमा सन्तुष्ट भने छैनन् । भन्छन झाँक्रि बनेदेखि राम्ररी स्कुल जान पाएको छैन्, पढाई बिग्रिएको छ, सरहरुले गाली गर्नुहुन्छ । न छोड्न सकिने न यसमा रमाउन सकिने अवस्था छ उनले भने । दिनका दिन मान्छेहरु बोलाउन आउँदा राम्ररी आराम समेत गर्न नपाउने उनि सुनाउँछन् । टाढा टाढाबाट मान्छेहरु बोलाउन आउँछन्, जाँदिन भन्न सक्दिन, फेरी त्यहीबाटै अन्यत्र लैजान्छन यसैगरी धेरै दिन वितिजान्छ, मुश्किलले घरमा आउँदा पनि मान्छेहरु घरमै आएर बसेका हुन्छन् उनि भन्छन् । आफुले पढाइलाई निरन्तरता दिन खोजेपनि नसकेको गुनासो उनको छ । 

विज्ञानले धामी झाँक्रिलाई पुष्टी गरेको छैन् । तर धामी झाँक्रिप्रतिको विश्वास अझै पनि घट्न सकेको छैन् । धामी झाँक्रि मान्छेको आस्थाकै रुपमा देखिन्छ । जुन आस्था एकाएक हट्ने देखिन्न । विज्ञानले पुष्टि नगरेपनि एउटा बालकमा देखापरेको यस्तो शक्तिले भने सबैलाई हैरान पारिरहेको छ ।