रुकुम पश्चिमको सदरमुकाम मुसिकोटबाट संचालनमा रहेको रेडियो सानोभरी एफ.एम. १००.८ मेगाहर्ज आज देखि आफ्नै भवनबाट संचालनमा आएको छ । आज कर्णाली प्रदेश सभा सदस्य महेन्द्र केसीले नयाँ भवनबाट रेडियोको प्रशारण उद्घाटन गर्नुभयो । २०६४ साल चैत्र २५ गतेबाट संचालनमा आएको रेडियो आजका दिनसम्म भाडाको घरबाट संचालन हुँदै आएको थियो । 

सुरुमा मुसिकोट नगरपालिका वडा नम्बर १ को डाँग्रिचौरबाट संचालनमा आएको रेडियो केही समयपछि खलंगा बजारमा झरेको थियो । खलंगा बजारमा पनि दुई वटा भाडाको घरबाट संचालनमा आएको रेडियो स्थापनाको १५ वर्ष पुरा भएपछि आफ्नै घरबाट संचालनमा आएको हो । 

यसअघि संचालनमा रहेको ठाउँ नजिकै रेडियोको भवन बनेको छ । यसअघि संचालित घरभन्दा पश्चिमतिर कालिकास्थान देखि जिल्ला प्रशासन कार्यालय जाने बाटो नजिक निर्माण भएको भवनबाट रेडियो सानीभेरी संचालनमा आएको हो । भवन निर्माणाधिन अवस्थामा छ ।

तर दोस्रो तलामा स्टुडियो लगायतका संरचनाको काम सकेर रेडियो संचालन गरिएको रेडियोका प्रवन्धक ध्रुबविक्रम बुढाथोकीले जानकारी दिनुभयो । रेडियो स्थापना भएको लामो समयसम्म भाडाको घरबाट संचालन गरिएको र अव आफ्नै भवनबाट संचालन गर्दा सहज हुने विश्वास उहाँको छ । 

भवन निर्माणको काम अझै बाँकी रहेको उहाँले बताउनुभयो । ४ तलाको भवन बनेकामा अव तेस्रो र चौथो तला फिनिसिङको काम बाँकी रहेको बुढाथोकीले बताउनुभयो । भवन निर्माणमा अहिलेसम्म ढेड करोड बजेट खर्च भएको रेडियो संचालक समितिले जनाएको छ । जसमध्ये कर्णाली प्रदेश सरकारबाट २ पटक गरेर ९० लाख र बाँकी रकम रेडियो आँफैले व्यवस्थापन गरेर खर्च गरेको छ । 

आर्थिक वर्ष २०७८÷०७९ मा कर्णाली प्रदेश आर्थिक मामिला तथा योजना मन्त्रालयबाट ७० लाख, चालु आर्थिक वर्ष २०७९÷०८० को निर्वाचन क्षेत्र पूर्वाधार विकास कार्यक्रम अन्तर्गत प्रदेश सभा क का तत्कालिन प्रदेश सभा सदस्य रातो कामीको २० लाख र खानेपानी, सरसफाई तथा उर्जा विकास कार्यालय रुकुम पश्चिमबाट ४ लाख ८ हजार बजेट आएको छ । 

नयाँ भवनबाट प्रशारण सुभारम्भ कार्यक्रमका अवसरमा रेडियो संचालक समितिले भवन निर्माणका लागि अझै रकम आवश्यक रहेको भन्दै सहयोगको अपिल गरेको छ । रेडियो संचालक समितिका अध्यक्ष गोविन्द रोकाको अध्यक्षतामा भएको कार्यक्रममा कर्णाली प्रदेश सभा सदस्य महेन्द्र केसीको प्रमुख आतिथ्यता रहेको थियो ।