रूकुम पश्चिमकाे बाँफिकाेट गाउँपालिका ८ काे टुरीधारा माेसेखाेलामा भएकाे जिप दुर्घटनामा परि मृत्यु हुनेकाे संख्या ५ पुगेकाे छ । बाँफिकाेट गाउँपालिका ८ का वडाध्यक्ष धनबहादुर केसीका अनुसार २२ दिनकाे बच्चा र आमा सहित ५ जनाकाे मृत्यु भएकाे हाे ।

मृत्यु हुनेमा बाँफिकाेट गाउँपालिका वडा नम्बर ५ कि रेखा केसी, उहाँका २२ दिनका छाेरा, सानीभेरी गाउँपालिका ५ का देउचन खत्री, ५ कै कर्णे बाँठामगर र शितला केसी रहेकाे वडाध्यक्ष केसीले बताउनुभयाे । शितलाकाे उपचारका लागि लैजादै गर्दा बाटाेमा र अन्यकाे घटनास्थलमै मृत्यु भएकाे उहाँकाे भनाई छ ।

दुर्घटनामा परि १० जना घाइते भएका छन् । सानीभेरी गाउँपालिका ५ हाँसुबाट मुसिकाेट खलंगा तर्फ आइरहेकाे लु १ ज १७४७ नम्बरकाे जिप टुरीधारा माेसेखाेलामा दुर्घटना भएकाे हाे । जिप सडकबाट करिब ५ सय मिटर तल खसेकाे छ । उकालाेमा ब्रेक फेल भएर जिप सडकबाट खसेकाे जस्ताे देखिएकाे वडाध्यक्ष केसीले बताउनुभयाे ।