रुकुम पश्चिमको त्रिवेणी गाउँपालिका वडा नम्बर ९ को हिमालय माध्यमिक विद्यालय नुवाकोट डाँडामा भएको अन्तरपालिका स्तरिय बैठकले पालिका भित्र रहेका साझा समस्यालाई मिलेर हल गर्ने निर्णय गरेको छ । शनिबार त्रिवेणी गाउँपालिका, चाैरजहारी र दार्माका विचमा भएकाे अन्तरपालिका स्तरिय बैठकले पालिका भित्र रहेका  विकास निमार्ण लगायत अन्य साझा  समस्यालाई मिलेर हल गर्ने सहमति भएको हो । अन्तरपालिका  बैठकले मुख्य ४ वटा निर्णयमा सहमति गरेको त्रिवेणी गाउँपालिका अध्यक्ष गणेशकुमार केसीले जानकारी दिनुभयो । 

उहाँका अनुसार झुल्नेटा, बागखोर, भेरीपोखरा, चोरबाटा नुवाकोटडाँडा हुँदै सानीभेरी गाउँपालिका वडा नम्बर ११ को सिम्लीको ग्रामिण सडक स्तराेन्नतीका लागि कर्णाली प्रदेश सरकारलाई बजेट माग गर्ने निर्णय भएको छ । त्यस्तै जलेखर्क, बागखोर, भेरिपोखरा, चोरबाटा, दुलाचौर, दार्माकोट हुँदै सिलिंगिसम्म जोड्ने ग्रामिण सडक स्तराेन्नती, त्रिवेणी गाउँपालिका वडा नम्बर ९ नुवाकोटडाँँडा, नाउली, साक्चाखोला हुँदै खोलागाउँ सम्मको सडक स्तराेन्नतिका लागि योजना माग गर्ने पनि निर्णय गरिएको उहाँले बताउनुभयाे ।

त्यस्तैे अन्तरपालिका स्तरिय सद्धभावलाई कायय राख्दै साझा रुपमा पहल गर्नुपर्ने विषयलाई आगामी दिनमा पनि साझा रुपमा हल गर्ने अन्तरपालिका स्तरिय बैठकले निर्णय गरेको छ । अन्तरपालिका  बैठकमा त्रिवेणी गाउँपालिका, चौरजहारी नगरपालिका र सल्यान जिल्लाको दार्मा गाउँपालिका विच साझा समस्या बारे छलफल भएको थियो । कार्य व्यस्तताका कारण सानीभेरी गाउँपालिकाकोे भने सहभागी नभएको र साझा समस्यामा मिलेर हल गर्ने प्रतिवद्धता जनाएकाे बताइएको छ । 

त्रिवेणी गाउँपालिका अध्यक्ष केसीको अध्यक्षतामा भएको बैठकमा चौरजहारी नगरपालिकाका नगर प्रमुख पुष्प वादी, दार्मा गाउँपालिका सल्यानका ५ नम्बर वडा अध्यक्ष सुदिप केसी, त्रिवेणी गाउँपालिका  प्रमुख प्रशासकीय अधिकृत प्रेमबहादुर घर्ती लगायत सरोकारवालाको उपस्थिथित रहेको थियो ।