राष्ट्रिय युवा पुरस्कारका लागि छनाेट भएकी रुकुम पश्चिमकी सिर्जना ओली सिज्जुलाई रुकुम पश्चिमको सानीभेरी गाउँपालिकाले पनि नगद रकम सहित सम्मान गरेको छ । आज गाउँपालिकामा एक कार्यक्रमको आयोजना गरी नगद ५० हजार रकम सहित सम्मान पत्रले सम्मान गरिएको हो ।

पर्यटन क्षेत्र जस्तो गौरवमय यात्रामा समाहित भएर सानीभेरी गाउँपालिका मात्रै नभएर समग्र कर्णाली प्रदेशलाई चिनाउन महत्वपुर्ण योगदान पुर्याएकाले गाउँपालिकाले नगद रकम सहित सम्मान पत्रले सम्मान गरेको गाउँकार्यपालिका प्रवक्ता पहलसिंह घर्तीले जानकारी दिनुभयो । पर्यटन क्षेत्रमा आगामी दिनहरुमा थप सपलताको शुभकामना समेत गाउँपालिकाले दिएको छ ।

नेपाल सरकार युवा तथा खेलकुद मन्त्रालयले प्रदान गर्ने राष्ट्रिय युवा प्रतिभा सम्मान कार्यक्रमा पनि उहाँ छनोटमा पर्नुभएको छ । जिल्लाको सानीभेरी गाउँपालिका वडा नम्बर ११ की सिर्जना कर्णाली चिनाउने अभियानमा लाग्नुभएको छ । 

लुकेको कर्णालीलाई बाहिर देखाउनका लागि उहाँ कर्णालीका विभिन्न ठाउँ पुगि रहनुभएको छ । कर्णालीमा दुःख, पीडा मात्र होइन सम्भावना पनि छ भनेर देखाउने उद्ेश्यले उहाँ लागि पर्नुभएको छ । यसअघि पनि उहाँले विभिन्न सम्मान पाइसक्नुभएको छ ।