राष्ट्रिय महिला भलिबल खेलाडी प्रगति नाथ गृह जिल्ला रुकुम पश्चिममा सम्मानित हुनुभएको छ । नेपालको राष्ट्रिय भलिबल टिममा परेपछि पहिलो चोटी गृह जिल्ला रुकुम पश्चिम पुगेकी नाथलाई विभिन्न निकायले नगद सहित सम्मान गरेका हुन् । 

जिल्ला समन्वय समितिमा एक कार्यक्रमको आयोजना गरी जिल्ला समन्वय समिति, जिल्ला खेलकुद विकास समिति, रुकुम पश्चिम भलिबल प्रशिक्षण केन्द्र सहित खेलकुदका विभिन्न विषयगत संघ लगायतका निकायले सम्मान गरेका हुन् । जिल्ला प्रशासन कार्यालयले पनि उहाँलाई सम्मान गरेको छ ।  

जिल्ला समन्वय समितिले सम्मान–पत्र सहित नगद ५ हजारले सम्मान गरेको छ । जिल्ला खेलकुद विकास समितिले पनि ५ हजार सहित सम्मान–पत्रले सम्मान गरेको हो । भलिबल प्रशिक्षण केन्द्रले प्रमाण पत्रले सम्मान गर्दा अन्यले दोसल्ला ओढाएर सम्मान गरेका हुन् । नागरिकता लिन गएकी प्रगतिलाई जिल्ला प्रशासन कार्यालयले कार्यालयमै सम्मान–पत्रले सम्मान गरेको हो । 

जिल्ला समन्वय समिति प्रमुख लुम्बिनी गौतमले प्रगतिले जिल्लाको शिर उचो बनाउने काम गरेको भन्दै धन्यवाद सहित थप सफलताको लागि शुभकामना दिनुभयो । सानै उमेरमा नेपालको राष्ट्रिय टिममा पर्नु चानचुने कुरा नभएको भन्दै उहाँले यसको निरन्तरताको कामना गर्नुभयो । जिल्लाको मात्र नभई देशकै शिर उचो पार्ने गरी खेल्न उहाँले आग्रह गर्नुभयो । 

तीन वर्ष अघि न्यु डायमण्ड क्लबमा जोडिएकी प्रगति भलिबलमा लागेको तीन वर्षमै नेपालको राष्ट्रिय टिममा पर्नुभएको हो । १७ वर्षिय प्रगतिले जेठ ८ देखि १४ गतेसम्म काठमाडौंमा संचालन भएको ८ देश सम्मिलित काभा महिला भलिबल च्याम्पियनसिपमा नेपाली राष्ट्रिय महिला भलिबल टिममा डेब्यु गर्नुभएको थियो । सेटरको भुमिकामा रहने प्रगतिले न्यु डायमण्ड क्लबबाट भलिबल खेलिरहनुभएको छ ।