रुकुम पश्चिमको बाँफिकोट गाउँपालिका रहेको स्यार्पू तालमा पौडी खेल्ने क्रममा डुबेर एक बालिका बेपत्ता भएकी छन् । बाँफिकोट गाउँपालिका वडा नम्बर ३ अलिगाउँकी ११ वर्षीया टीका बिक आज स्पार्पू तालमा वेपत्ता भएकी हुन् । आज दिउँसो विद्यालयको खाजा समयमा पौडी खेल्न गएकी डिलबहादुर बिककी अन्दाजी १०–११ वर्षिय छोरी टीका वेपत्ता भएको जिल्ला प्रहरी कार्यालय रुकुम पश्चिमले जानकारी दिएको छ । 

स्यार्पू ताल माध्यमिक विद्यालयमा कक्षा ४ मा अध्यनरत बिक सहित ५–६ जना विद्यार्थी स्यार्पू तालमा पौडी खेल्न गएका थिए । अन्य भने सकुशल रहेको जिल्ला प्रहरी कार्यालय रुकुम पश्चिमका सूचना अधिकारी प्रहरी निरीक्षक धर्मेन्द्र खड्काले जानकारी दिनुभयो । 

उहाँका अनुसार बालिका वेपत्ता भएको खवर प्राप्त भएपछि इलाका प्रहरी कार्यालय बाँफिकोटबाट प्रहरी वरीष्ठ हवल्दार विमलबहादुर शाहीको कमाण्डमा ३ जनाको प्रहरी टोली खोजी कार्यका लागि खटिएको छ । अहिले स्थानीय र प्रहरी टोलीले बालिकाको खोजी गरिरहेको तर फेला पार्न नसकिएको प्रहरीले जनाएको छ ।