राप्ती साहित्य परिषद् जिल्ला शाखा रुकुम पश्चिमको नियमित कार्यक्रम अन्तर्गत एकल रचना वाचनको २७ औं श्रृंखला सम्पन्न भएको छ । साहित्यकार प्रेम संगमको प्रस्तुतीमा त्रिवेणी गाउँपालिकाको सभाहल खारानेटामा कार्यक्रम संचालन भएको हो । 

साहित्यकार प्रेम संगमले तीन चरणमा तीस वटा गजल वाचन गर्नुभएको थियो । उहाँले आफैले सृजना गरेका माया प्रेम देखि विभिन्न विषय समेटिएका गजल वाचन गर्नुभएको थियो । उहाँ त्रिवेणी गाउँपालिकाको प्रमुख प्रशासकीय अधिकृत हुनुहुन्छ । 

त्यस्तै विश्राम समयमा अन्य स्रष्टाहरुले कविता, गीत, गजल, अनुभूति प्रस्तुत गरेका थिए । कार्यक्रममा एकल रचना वाचक प्रेम संगमको स्रष्टा चिनारी साहित्यकार मुकुन्दप्रसाद शर्माले गराउनुभएको थियो । वाचित रचनाहरुको समिक्षा पनि शर्माले नै गर्नुभएको थियो । 

कार्यक्रममा साहित्यकार खगेश्वर भण्डारी, विष्णु आचार्य र दिपेन्द्रकुमार ओलीले शुभकामना मन्तव्य राख्नुभएको थियो । राप्ती साहित्य परिषद् जिल्ला शाखा अध्यक्ष मनलाल ओलीको अध्यक्षतामा भएको कार्यक्रममा त्रिवेणी गाउँपालिकाका अध्यक्ष गणेशकुमार केसीको प्रमुख आतिथ्यता रहेको थियो ।

कार्यक्रममा त्रिवेणी गाउँपालिका उपाध्यक्ष राजकुमारी रेउले र राप्ती साहित्य परिषद् जिल्ला शाखाका सल्लाहकार मुकुन्दप्रशाद शर्माको विशेष आतिथ्यता रहेको थियो ।