रुकुम पश्चिमको चौरजहारी नगरपालिकामा राष्ट्रपति रनिङ शिल्ड तथा नगर प्रमुख कपको उद्घाटन गरिएको छ । १३ औं राष्ट्रपति रनिङ शिल्ड तथा चौथो नगर प्रमुख कप वडा नं. २ स्थित शितल माध्यमिक बिद्यालयमा सुरु भएको हो । शिल्ड तथा नगर प्रमुख कपमा ४१ वटा बिद्यालयको सहभागिता रहेको छ । भलिबल, लामाे, छाेटाे दाैड, सटफुट, ज्याभलिङ थ्राे, हाइजम्प, लङ्गजम्प, हिसाब दाैड लगायतमा प्रतिस्प्रधा हुने छ । 

जिल्ला समन्वय समितिका प्रमुख राजकुमार शर्माले पानसमा बत्ती बालेर उद्घाटन गर्नुभयो । साथै उहाँ २ मिटर राँके दौड पनि दौडिनु भएको थियो । कार्यक्रमको उद्घाटन गर्दै प्रमुख शर्माले जिल्लाको खेलकुद विकासका लागि सबैको हातेमालो आवश्यक रहेको बताउनुभयो । जिल्लालाई खेलकुदका माध्यमबाट पनि चिनाउनुपर्नेमा उहाँको जोड थियो । चौरजहारीमा ठुला खेल सञ्चालनका लागि खेलमैदान आवश्यक रहेकाले यसतर्फ आफुहरुको ध्यान केन्द्रीत रहेको उहाँको भनाई थियो ।

आजै जनप्रतिनिधि र कर्मचारी बिच भएको मैत्रीपूर्ण भलिबल प्रतियोगितामा कर्मचारी टिम बिजय भएको छ ।