रुकुम पश्चिमको मुसिकोट नगरपालिका वडा नम्बर १ मा रहेको मुसिकोट खलंगा बहुमुखी क्याम्पसमा वृक्षारोपण गरिएको छ । अखिल (क्रान्तिकारी) मुसिकोटले आज बिहान क्याम्पस परिषरमा विभिन्न प्रजातिका विरुवा रोपेकाे हाे । 

कल्की, गोलमोहर र पारिजात जातका ५० वटा विरुवा रोपिएको अखिल क्रान्तिकारी मुसिकोट नगर अध्यक्ष दुर्गाप्रसाद विश्वकर्माले जानकारी दिनुभयो । क्याम्पस परिषरलाई हरियाली बनाउने उदे्श्यले वृक्षारोपन गरिएको उहाँले बताउनुभयो । 

मुसिकोटका विभिन्न क्याम्पस, विद्यालय र जिल्ला अस्पतालमा वृक्षारोपन गर्ने कार्यक्रम अन्तर्गत आज मुसिकोट खलंगा बहुमुखी क्याम्पसमा वृक्षारोपन गरिएको संगठनका नगर अध्यक्ष विश्वकर्माले बताउनुभयो । 

उहाँका अनुसार अव जिल्ला अस्पताल सल्ले, सरस्वती मावि सल्ले र यमुना नन्द नमुना मावि सेरिगाउँमा वृक्षारोपन गर्न बाँकी रहेको छ । सबै ठाउँमा वृक्षारोपनका लागि करिब डेढ सय विरुवा खरिद गरिएको अखिल क्रान्तिकारी मुसिकोटले जनाएको छ ।   

आजको वृक्षारोपन कार्यक्रममा मुसिकोट खलंगा बहुमुखी क्याम्पस प्रमुख बुद्धिप्रसाद गौतम, स्ववियु सभापति रमेश लामिछाने, अखिल क्रान्तिकारीका जिल्ला उपाध्यक्ष तथा नगर इन्चार्ज विशाल बिष्ट, अखिल क्रान्तिकारी मुसिकोटका पदाधिकारी एवं सदस्य, क्याम्पसमा अध्यनरत विद्यार्थीहरु लगायतको सहभागिता रहेको थियो ।