रुकुम पश्चिमको बाँफिकोट गाउँपालिका वडा नम्बर ७ को बाँसथलामा घाँस काट्ने क्रममा पहिरो खस्दा २ जनाको मृत्यु भएको छ । एक जना घाइते भएका छन् । आइतबार दिउँसो पौने तीन बजेको समयमा बाँसथलास्थित पोखरापरी भिरमा घाँस काट्न गएका बेला पहिरोसंगै खस्दा स्थानीय एक महिला र एक पुरुषको मृत्यु भएको जिल्ला प्रहरी कार्यालयले जनाएको छ ।
मृत्यु हुनेमा बाँफिकोट ७ की ४५ वर्षिया धनमाया खत्री र सोही ठाउँका ४४ वर्षिय कालीबहादुर खड्का रहेकाे जिल्ला प्रहरी प्रमुख प्रहरी नायब उपरीक्षक नमराज भट्टराईले जानकारी दिनुभयो । उहाँका अनुसार खत्री र खड्काको घटनास्थलमै मृत्यु भएको हो । त्यस्तै घाइते हुनेमा बाँफिकोट ७ कै ४२ वर्षिया बलकुमारी खत्री रहेको डिएसपी भट्टराईले बताउनुभयो ।
घाइतेलाई उपचारका लागि अस्पताल तर्फ पठाइएको छ । घाँस काट्ने क्रममा टेकेको ठाउँ भासिएर तीन जना पहिरोसंगै खसेको उहाँको भनाई छ । उनिहरु करिब ५ सय मिटर तल खसेको र ढुंगाले च्यापिएको अवस्थामा फेला परेको प्रहरीले जनाएको छ । घटनास्थलमा प्रहरी चौकी नदुवा र इलाका प्रहरी कार्यालय आठबीसकोट राडीको टोली पुगेको थियो ।
