एक युवतीलाई बाटो छेकी हातपात गर्ने ४ जनालाई रुकुम पूर्व प्रहरीले पक्राउ गरेको छ । रुकुम पूर्वको भूमे गाउँपालिका वडा नम्बर ८ कुचिवाङकी २० वर्षिया एक युवतीलाई बाटोमा हिडिरहेको अवस्थामा बाटो छेकी तानतान भन्दै हातपात गर्ने भूमेकै ४ जनालाई प्रहरीले पक्राउ गरेको हो । 

पक्राउ पर्नेमा भूमे गाउँपालिका २ का ४० वर्षिय जयकुमार पुन, सोही वडाका २६ वर्षिय विकास पुन र वर्ष २६ कै कमल पुन तथा वडा नम्बर ३ का २९ वर्षिय विकास रोकालाई पक्राउ गरिएको जिल्ला प्रहरी कार्यालय रुकुम पूर्वका सूचना अधिकारी प्रहरी निरीक्षक गणेश पाण्डेले जानकारी दिनुभयो । 

यो घटना साउन ४ गतेको हो । भूमे १ लुकुममा झाँक्रिमेला लागेका बेला यो घटना भएको थियो । हातपातको भिडिओ सामाजिक सञ्जालमा भाइरल भएपछि उक्त घटना सार्वजनिक भएको थियो । उक्त भिडिओ पनि युवतीमाथि हातपात गर्ने युवाहरुले नै खिचेको प्रहरीले जनाएको छ । 

प्रहरीका अनुसार ४ जनाले युवतीलाई हातपात गर्नुका साथै हातपातका क्रमको भिडिओ समेत खिचेर सामाजिक सञ्जालमा राखेका थिए । पक्राउ परेकाहरुलाई अभद्र व्यवहार सम्बन्धी कसूर मुद्दामा जिल्ला प्रशासन कार्यालयबाट आइतबार म्याद थप गरी अनसन्धान गरिरहेको प्रहरी निरीक्षक पाण्डेले बताउनुभयो ।

सामाजिक सञ्जालमा भाइरल भिडिओमा तिमी मलाई मन पर्यो भन्दै युवतीलाई तानिरहेको देखिन्छ । युवतीले भने आफ्नो विवाह भइसकेको र श्रीमानले आफुलाई कुरिरहेको बताएको सुनिन्छ । उनी आफुलाई छोड्न केटाहरुसंग बिन्तिभाउ गरिरहेकी देखिन्छिन् । तर केटाहरुले भने उनलाई जवरजस्ती तानिरहेका हुन्छन् । उनी केटाहरुबाट उम्किने प्रयास गरिरहेकी देखिन्छिन् । 

आफुलाई समात्ने केटाहरुको हात टोकेर आफु फुत्किएर भागेको र त्यसपछि पनि उनीहरुले आफ्नो पिछा नछाडेको उनले एक मिडियालाई बताएकी थिइन् । केही टाढा भागेर ढुंगाले हानेपछि भने उनीहरुले आफुलाई पिछा गर्न छाडेको उनले उक्त मिडियासंगको कुराकानीमा बताएकी थिइन् ।