नेपाली कांग्रेसका नेता तथा लुम्बिनी प्रदेश सांसद धनबहादुर केसीले पार्टीका नेता तथा कार्यकर्ताहरुलाई विकास निर्माणका लागि आएको बजेटको सदुपयोगमा ध्यान दिन निर्देशन दिनुभएको छ । पार्टीको आन्तरिक विशेष अभियान अन्तर्गत रुकुमकोटमा भएको कार्यक्रममा बोल्दै सांसद केसीले जिल्लामा विकास निर्माणका लागि आएको बजेट सही ठाउँमा प्रयोग गर्न निर्देशन दिनुभएको हो ।  

त्यस्तै उहाँले भ्रष्टाचार, अनियमितता र कमिसनको अन्त्य गर्दै विकास निर्माणका काममा राजनीति नगर्न समेत नेता कार्यकर्ताहरुलाई निर्देशन दिनुभएको छ । जिल्लामा विकास निर्माणमा राजनीति नगरी सबै एक ठाउँमा रहेर काम गर्नुपर्नेमा उहाँले जोड दिनुभएको छ । जिल्लामा धेरै समस्या रहेको तर्फ लक्षित गर्दै उहाँले सबै काम एकैचोटी गर्न सम्भव नभएको र क्रमिक रुपमा हुने बताउनुभयो । 

साथै उहाँले लुम्बिनी प्रदेश सरकारबाट जिल्लामा गत वर्षको भन्दा धेरै बढी बजेट आएको र अब यसको सही कार्यान्वयन तर्फ सबैले ध्यान दिन आवश्यक रहेको उहाँको भनाई छ । सडक, कृषि, खानेपानी, पर्यटन र शिक्षाको क्षेत्रमा प्राथमिकता साथ बजेट आएको सांसद केसीले जानकारी गराउनुभयो । 

उहाँले सरकारले गरेका सकारात्मक कामको बारेमा जनतालाई जानकारी गराउन पनि उहाँले नेता कार्यकर्ताहरुलाई आग्रह पनि गर्नुभएको छ ।