रुकुम पश्चिमको मुसीकोट नगरपालिका वडा नम्बर १० ले वडाको विभिन्न ठाउँमा वृक्षारोपन गरेको छ । बुधबार वडाले वडा कार्यालय परिसर र विद्यालय परिसर भित्र नयाँ प्रजातिको विरुवा रोपेको हो । दक्षिण अमेरिकी प्रजातीको जाकाराण्डा ओभली फोलिया (गोल्मोर) फुलका विरुवा रोपिएको वडा अध्यक्ष धनबहादुर खड्का ‘बसन्त’ले जानकारी दिनुभयो । 

उहाँका अनुसार वडा कार्यालय परिसर, मालिका माध्यमिक विद्यालय चुन, जनता आधाभूत विद्यालय गलमपाटी र शान्ति नमुना आधारभूत विद्यालय डेलडाराको परिसरमा गोल्मोरका ६० वटा विरुवा रोपिएको हो । डिभिजन वन कार्यालय रुकुम पश्चिमले वडा कार्यालयलाई गोल्मोरका बिरुवा उपलब्ध बनाएको हो । वडा अध्यक्ष खड्काको नेतृत्वमा वडा सदस्य, शिक्षकहरुको सहभागितामा बुधबार वृक्षारोपन  गरिएको हो ।