रुकुम पश्चिमको त्रिवेणी गाउँपालिका वडा नम्बर १ दहभागे लेकको एक घरबाट नगद सहित सुन चोरी भएको छ । शुक्रबार दिउँसो स्थानीय तिलक ओलीको दहभागे गाउँभन्दा केही माथि लेक भन्ने ठाउँमा रहेको घरबाट नगद सहित सुन चोरी भएको हो । ओलीका अनुसार ढाई तोला सुन सहित नगद ६० हजार चोरी भएको छ । घरमा आमा एक्लै भएको मौका पारी सुन र नगद चोरी गरेर घरमा आगो समेत लगाई दिएको उहाँको भनाई छ ।

घर भित्र रहेकी आमाले बाहिर निस्कदा आगो लागेको देखेपछि आगो निभाएकाले घरमा अन्य क्षति भने नभएको ओलीले बताउनुभयो । चोरी भएको थाहा पाएपछि आज प्रहरी चौकी सिम्रुतुबाट प्रहरी टोली घटनास्थलमा गएको प्रहरी चौकी सिम्रुतुका प्रहरी वरिष्ठ हवल्दार शक्ति मनालेले जानकारी दिनुभयो । चोरी भएका सामानको विवरण संकलन र थप अनुसन्धान भइरहेको उहाँले बताउनुभयो ।