रुकुम पश्चिममा सामुदायिक वनहरुमा सुशासन कार्यक्रम जारी छ । जिल्लाका ७३ वडाका सामुदायिक वनहरुमा सुशासन कार्यक्रम अन्तर्गत विभिन्न कार्यक्रम सन्चालन भइरहेका छन । जिल्लाका ७३ वडामा रहेका ३ सय ८६ वटा सामुदायिक वनमा सुशासन कार्यक्रम संचालन भइरहेको डिभिजन वन कार्यालय रुकुम पश्चिमका निमित्त कार्यालय प्रमुख शेरबहादुर परियारले जानकारी दिनुभयो ।

उहाँका अनुसार सामुदायिक वनलाई पारदर्शि र व्यवस्थित बनाउन भदौ १ गते देखि सामुदायिक वनमा सुशासन कार्यक्रम सुरु गरिएको हो । यो अभियानले वन उपभोक्ता समितिलाई सक्रिय बनाउनुका साथै वन समितिमा देखिएका समस्यालाई सुधार गर्न सहयोग पुग्ने अपेक्षा गरिएको छ । अभियान भदौ र असोज गरी २ महिना संचालन हुने छ ।

सुशासन अभियान मार्फत वडास्तरमै सामुदायिक वन उपभोक्ता समुहको वार्षिक लेखा परिक्षण, वार्षिक प्रगति प्रतिवेदन, म्याद समाप्त भएका सामुदायिक वन उपभोक्ता समुहको वन कार्ययोजना नविकरणका कार्यक्रम संचालन भइरहेका छन । त्यस्तै सामुदायिक वन उपभोक्ता समुहको अभिलेख व्यवस्थापन, समुहहरुको आमभेला तथा अवधि सकिएकाको हकमा कार्यसमिति पुनर्गठन लगायतका कार्यक्रम संचालन भइरहेको निमित्त प्रमुख परियारले जानकारी दिनुभयो ।

डिभिजन वन कार्यालय रुकुम पश्चिमले सामुदायिक वनमा सुशासन अभियान २०८० अन्तर्गत सबै वडामा पुगि सामुदायिक वनमा सेवा प्रवाह गरिरहेको छ । उक्त कार्यक्रमको वारेमा जानकारी प्राप्त हुँदा हुंदै पनि सामुदायिक वन उपभोक्ता समितिहरु सम्बन्धित वडास्तरमा हुने कार्यक्रममा उपस्थित तथा समन्वय नगरेको पाइएमा उक्त समितिलाई १५ दिनको समय दिएर छानविन समेत गरिने डिभिजन वन कार्यालयले जनाएको छ ।

छानबिनका क्रममा सामुदायिक वनको रकम हिनामिना गरेको पाइएमा वन ऐन २०७६ बमोजिम तत्काल कार्वाही प्रक्रिया अगाडि बढाईने समेत डिभिजन वन कार्यालय रुकुम पश्चिमले जनाएको छ ।