रुकुम पश्चिमको मुसिकोट नगरपालिका वडा नम्बर ५ ले ३३ जना किसानलाई सुत्केरी भैंसी स्याहार खर्च उपलब्ध गराएको छ । भैंसी स्याहार कार्यक्रम अन्तर्गत वडामा सुचिकृत ३३ जना भैंसी पालक किसानलाई वडाले आज नगद रकम वितरण गरेको हो । गत आर्थिक वर्षमा सुचिकृत भएका ३३ जना किसानलाई नगद ३ हजारका दरले रकम वितरण गरिएको वडाध्यक्ष समिरजङ मल्लले जानकारी दिनुयभो । 

उहाँका अनुसार वडाको थर्पु टोलका २० जना, घोयपानीका १२ जना र सेरिगाँउका १ जना भैंसी पालक किसानलाई सुत्केरी भैंसी स्याहार रकम उपलब्ध बनाइएको हो । गत आर्थिक वर्षको सुत्केरी भैंसी स्याहार कार्यक्रम अन्तर्गतको १ लाख बजेटबाट किसानलाई रकम वितरण गरिएको वडाध्यक्ष मल्लको भनाई छ । वडाका भैंसी पालक किसानहरुलाई थप व्यवसायिक बनाउने र आर्थिक उपार्जनमा बृद्धि गर्ने उद्ेश्यले सुत्केरी भैँसी स्याहार कार्यक्रम बनाइएको मल्लले बताउनुभयो ।  

यो कार्यक्रम नियमित रुपमा संचालन हुने वडाध्यक्ष मल्लको भनाई छ । सुत्केरी भैंसी स्याहार कार्यक्रममा सुचिकृत हुन किसानले आफ्नो नागरिकता, सुत्केरी भैंसीसंगै खिचिएको एक प्रति फोटो र जग्गाधनी कागज सहित वडा कार्यालयमा सम्पर्क गर्नुपर्ने हुन्छ । किसान सुचिकृत भएपछि वडाले टोलमै पुगेर स्थलगत अवलोकन गर्ने गर्छ । वडाले रकम भने आर्थिक वर्षको अन्तिममा दिने गरेको छ ।