रुकुम पश्चिमको मुसिकोट नगरपालिका वडा नम्बर ८ मा स्थानीयको श्रमदानमा काठेपुल निर्माण गरिएको छ । स्थानीयले वडाको घट्टेखोलामा काठेपुल निर्माण गरेका हुन् । खोलामा पुल नहुँदा स्थानीयलाई खोला तर्न मुश्किल भएको थियो । पुल निर्माणका लागि कतैबाट पहल नभएपछि आफैले पुल निर्माण गरेको स्थानीय टेकराज विश्वकर्माले बताउनुभयो । 

स्थानीय युवाहरुको पहलमा करिब १ लाख ५० हजारको लगानीमा काठेपुल निर्माण गरिएको उहाँको भनाई छ । वर्षातको समयमा खोला तर्न निकै मुश्किल भएपछि बाध्य भएर पुल निर्माण गरिएको उहाँले बताउनुभयो । पुल निर्माणमा लागेको सबै खर्च स्थानीयको छ । यसमा वडाले १० हजार दिने आश्वासन दिएको बताइएको छ । पुल निर्माण भएपछि स्थानीयलाई सहज भएको विश्वकर्माले बताउनुभयो । 

छाना सहितको पुल निर्माण गरिएपछि पुल पनि धेरै समय टिक्ने भन्दै स्थानीय हर्षित छन् । हालसम्म खोलामा पुल नहुँदा त्यस क्षेत्रका स्थानीय जोखिम मोलेर घट्टेखोला तर्न बाध्य थिए ।