रुकुम पश्चिमको आठबीसकोट नगरपालिका वडा नम्बर २ की वडा सदस्य प्रेङका यरीले आफ्नो जन्मदिनको अवसरमा एक विद्यालयलाई सहयोग गर्नुभएको छ । आठबीसकोट नगरकार्यपालिकाको पूर्व सदस्य समेत रहनुभएकी उहाँले वडा नम्बर २ कै नविन आधारभूत विद्यालय पहाडालाई १० हजार नगद र १० हजार बराबरको शैक्षिक सामग्री सहयोग गर्नुभएको छ । जन्मदिनमा गरिने फजुल खर्चलाई कटाएर विद्यालयलाई सहयोग गरेको उहाँले बताउनुभयो ।

उहाँले उक्त रकम विद्यालयका प्रध्यानाध्यापक रविन्द्रबहादुर विश्वकर्मालाई हस्तान्तरण गर्नुभयो । उहाँ उक्त विद्यालयको पूर्व विद्यार्थी समेत हुनुहुन्छ । आफ्नो सामाजिक सेवा भाव अनुसार विद्यालयलाई सहयोग गरेको उहाँले बताउनुभयो । आफुले कखरा चिनेको विद्यालयलाई थोरै भएपनि सहयोग पुगोस भनेर सहयोग गरेको उहाँको भनाई छ ।

उहाँले यसअघिका वर्षहरुमा पनि जन्मदिनको अवसरमा अनाथ तथा असहाय बालबालिकाहरुलाई सहयोग गर्दै आइरहेको बताउनुभयो । सहयोगी यरीलाई विद्यालयले धन्यवाद व्यक्त गरेको छ । जन्मदिनको शुभकामना सहित सहयोग गरेको भन्दै विद्यालयले यरीलाई धन्यवाद ज्ञापन गरेको हो ।