रुकुम पश्चिममा खरको छाना हटाउने अभियानले तीव्रता पाएको छ । जिल्लाभरमा एक वर्षको अवधिमा झन्डै साढे दुई हजार घरका छाना फेरिएका छन् । गत आर्थिक वर्षमा जिल्लामा तीन नगरपालिका र तीन गाउँपालिकामा २ हजार ४२ घरमा खरको छाना हटाएर जस्तापाता राखिएको हो । यसका लागि जिल्लाभरमा कुल १३ करोड २० लाख बजेट खर्च भएको छ ।
बितेको वर्ष सबैभन्दा बढी १ हजार १ सय २० वटा खरका छाना विस्थापित आठबीसकोट नगरपालिकाले गरेको छ । सबैभन्दा कम सानीभेरी गाउँपालिकामा ५२ वटा घरका छाना फेरिएको छ । मुसिकोट नगरपालिकाले १ सय ६१, चौरजहारी नगरपालिकाले २ सय ३०, त्रिवेणी गाउँपालिकाले २ सय १४ र बाँफिकोट गाउँपालिकाले २ सय ६५ वटा खरका छाना विस्थापित गरेको छ ।
सुरक्षित जनता आवास कार्यक्रममा छनोट भएका घरहरुमा जस्तापाताको छाना राख्न चौरजहारी नगरपालिका, त्रिवेणी गाउँपालिका र सानीभेरी गाउँपालिकाले सम्मान ५० हजारका दरले रकम भुक्तानी गरेका थिए । मुसिकोट नगरपालिकामा प्रति घर ५५ हजारका दरले रकम उपलब्ध गराइएको नगर कार्यपालिका प्रवक्ता समिरजंग मल्लले जानकारी दिनुभयो ।
उहाँका अनुसार जनता आवास कार्यक्रम अन्तर्गत नगरपालिकाले ८९ लाख बजेट खर्च गरेको छ । बाँफिकोट गाउँपालिकाले घर ठुलो सानोको आधारमा छनोट भएका २ सय ६५ घरहरू मध्ये ३४ घरधुरीलाई ३१ हजार ८ सय २३ र बाँकी २ सय ३१ घरधुरीलाई ५० हजारका दरले रकम भुक्तानी गरेको गाउँपालिकाका प्राविधिक प्रमुख दलबहादुर ओली जानकारी दिनुभयो ।
आठबीसकोट नगरपालिकामा भने १ हजार १ सय २० घरधुरीलाई टेन्डर प्रक्रिया मार्फत हुलास स्टिल उद्योग कम्पनीले ८ करोड ५७ लाखमा जस्तापाता उपलब्ध गराएको थियो । ठेक्का मार्फत जस्तापाता उपलब्ध बनाउँदा छनोट भएका घरपरिवारलाई राहत भएको निमित्त प्रमुख प्रशासकीय अधिकृत मणिराज शाहले बताउनुभयो । आ.व. २०७९/०८० मा नगरपालिकामा ठुलो सङ्ख्यामा खरका छाना विस्थापित गरे पनि अझै खरका छाना विस्थापित गर्न ४ सय ८० घर बाँकी रहेको उहाँको भनाई छ ।
त्यस्तै सानीभेरी गाउँपालिकामा खरको छाना विस्थापित गर्न २६ लाख, त्रिवेणी गाउँपालिकामा १ करोड ७ लाख र चौरजहारी नगरपालिकामा १ करोड १५ लाख बजेट खर्च भएको छ । आर्थिक अवस्था कमजोर, खरको छाना भएका र विपन्न परिवारलाई वडाले सिफारिस गरेको आधारमा छनोट गरी पालिकाहरुले जस्तापाता उपलब्ध बनाएका थिए । खरको छाना हटाउन नसक्ने परिवार पालिकाबाट सहयोग पाएपछि हर्षित भएका छन् ।
