रुकुम पश्चिमको मुसिकोट नगरपालिकाले अवैध संरचना हटाउन दिएको ३० दिने समय आइतबार सकिएको छ । नगरपालिकाले गत साउन ३० गते सूचना जारी गर्दै ३० दिन भित्रमा नगरपालिका क्षेत्र भित्र पर्ने राप्ती राजमार्गको मुआब्जा बुझेको क्षेत्रमा बनाइएका संरचना हटाउन भनेको थियो । तर उक्त समय आइतबार सकिएको छ भने अवैध संरचना हटाइएको छैन । सेरिगाउँ देखि सल्लेसम्म र वडा नम्बर ४ को सोलावाङ बजार क्षेत्रको सडक छेउमा निर्माण गरिएका अवैध संरचना हटाउने तयारीमा नगरपालिका छ । सोही अनुसार आफुखुसी उक्त संरचना हटाउन नगरपालिकाले नगरवासीलाई अनुरोध गरेका थियो ।
तर नगरपालिकाले तोकेको ३० दिनको समय सकिदा पनि सडक छेउका अवैध संरचना जस्ताको तस्तै छन् । फाट्टफुट्ट केही व्यक्तिले आफै संरचना हटाए पनि अधिकांश संरचना उस्तै छन् । नगरपालिकाले यस अघि नै ३ दिन लगाएर सडक छेउमा निर्माण भएका अवैध संरचनाका पहिचान गरेको थियो । सडकको क्षेत्राधिकारमा निर्माण गरिएका संरचनामा नगरपालिकाले मार्किङ गरेको छ । अवैध संरचना हटाउन सजिलो होस भनेर अवैध संरचनामा मार्किङ गरिए पनि नगरवासीले त्यसको बेवास्ता गरेका छन् ।
मुसिकोट नगरपालिका वडा नम्बर ५ बागबजारका भिमबहादुर परियारले भने नगरपालिको गरेको निर्णयलाई स्वागत गर्दै घर अगाडी निर्माण भएका अवैध संरचना हटाइसक्नुभएको छ । नगरपालिकाले तोकेको सडक क्षेत्र भित्र संरचना रहेकाले कामदार लगाएर हटाएको परियारले बताउनुभयो । सडक क्षेत्रभित्र पर्ने अवैध संरचना सबैले हटाउनुपर्ने उहाँको भनाई छ । तोकिएको समयभित्र अवैध संरचनाहरू स्वयं धनीले खाली नगरेपछि अव कसरी अगाडी बढ्ने भनेर छलफल गरिने नगरपालिकाका प्रवक्ता समरजङ्ग मल्लले बताउनुभयो ।
समय थप गर्ने कि संरचना हटाउन लाग्ने भन्ने विषयमा निर्णय हुन बाँकी रहेको उहाँको भनाई छ । बजार क्षत्रलाई सुन्दर र फराकिलो बनाउने तथा सवारी व्यवस्थापन र दुर्घटना न्यूनीकरण यसअघि नै मुआब्जा बुझेका सडक क्षेत्राधिकारमा पर्ने अवैध संरचना हटाउन लागिएको नगरपालिकाले जनाएको छ ।
