रुकुम पश्चिमा अवैध भरुवा बन्दुकसहित एक जनालाई प्रहरीले पक्राउ गरेको छ । जिल्लाको मुसिकोट नगरपालिका वडा नम्बर ६ मेलचौरका ३६ वर्षीय झकेन्द्र भण्डारीलाई प्रहरीले पक्राउ गरेको हो । आफ्नै घरमा अवैध हातहतियार लुकाई छिपाई राखेको गोप्य सूचना पाएपछि जिल्ला प्रहरी कार्यालयबाट प्रहरी निरीक्षक धर्मेन्द्र खड्काको नेतृत्वमा खटिएको ११ जनाको प्रहरी टोलीले भण्डारीलाई पक्राउ गरेका हो ।

बिहीबार बेलुका भण्डारीलाई भरुवा बन्दुकसहित घरबाटै पक्राउ गरिएको जिल्ला प्रहरी कार्यालयका सूचना अधिकारी प्रहरी निरीक्षक धमेन्द्र खड्काले जानकारी दिनुभयो । उहाँका अनुसार घरमा पुगी खोजतलास गर्दा लुकाई राखिएको २ नाल भरुवा बन्दुक, भरुवा बन्दुकको पुरानो नाल १ थान, नाल बनाउन प्रयोग हुने पाइप १ थान, सर्ट गनको कार्टिज ५ थान, बारुद बनाउन प्रयोग गरिने पदार्थ ५० ग्राम, सोडा जस्तो देखिने पदार्थ ५ सय ग्राम पनि बरामद गरिएको छ ।

फलामको छर्रा ६ थान, फलामको रडका टुक्रा १५ थान क्यापमा प्रयोग हुने पटका २० रोल बरामद गरिएको प्रहरीले जनाएको छ । त्यस्तै बारुद जस्तो देखिने पदार्थ  ५ सय ६५ ग्राम र ९० ग्रामको दुई डिब्बा, वायरिङ १४ थान, साइकलको वायरिङ १५० थानसहित भण्डारीलाई पक्राउ गरी जिल्ला प्रहरी कार्यालय ल्याएको प्रहरी निरीक्षक खड्काले जानकारी दिनुभयो । म्याद थप गरी अनुसन्धान भइरहेको प्रहरीले जनाएको छ । जिल्लाको सबै ठाउँमा अवैध हातहतियार बरामद गर्ने उद्देश्यले खान तलासी  अभियान तीव्र रुपमा सञ्चालन गरेको समेत जिल्ला प्रहरी कार्यालय रुकुम पश्चिमले जनाएको छ ।