आठौँ राष्ट्रिय लोक दोहोरी म्युजिक अवार्ड २०८० अन्तर्गत उत्कृष्ट म्युजिक भिडिओ इडिटर अवार्ड राजकुमार मगरले जित्नुभएको छ । रुकुम पश्चिमका मगरले हिजो भएको अवार्ड प्रदान कार्यक्रमबाट उत्कृष्ट भिडिओ इडिटर अवार्ड पाउनुभयो । उहाँले चल्यो बतास–२ राजा रानी गीतको भिडियोबाट अवार्ड जित्नुभएको हो । मगर विगत लामो समय देखि भिडिओ इडिटिङमा कार्यरत हुनुहुन्छ । उहाँले इडिट गरेका धेरै म्युजिक भिडिओ सुपर हिट छन् ।

उहाँ भिडिओ इडिटिङमा धेरै व्यस्त हुनुहुन्छ । उहाँको माग धेरै छ । उहाँले यसअघि पनि भिडिओ इडिटिङमा थुप्रै अवार्ड समेत जितिसक्नुभएको छ । मगर भिडिओ इडिटिङमा मात्र नभई मोडलिङ र भिडिओ निर्देशनमा समेत व्यस्त हुनुहुन्छ । उहाँले मोडलिङ र निर्देशन गरेका धेरै गीत चर्चित समेत छन् ।

उहाँले पछिल्लो पटक प्रकाश रन्काको कान्छी फिलिली नामक गीतको म्युजिक भिडिओमा मोडलिङ गर्नुभएको छ । यस गीतको निर्देशन मगरले नै गर्नुभएको हो । यो गीतमा प्रकाश रन्का र एलिना चौहानले आवाज दिनुभएको छ भने मोडलिङमा मगरका साथमा रुकुमकै रेनुका खड्का फिचर्ड हुनुहुन्छ ।