रुकुम पश्चिमको मुसिकोट नगरपालिकामा जनक–सुधन स्मृति रनिङ्ग शिल्ड महिला पुरुष भलिबल प्रतियोगिता सुरु भएको छ । रुकुम पश्चिम भलिबल प्रशिक्षण केन्द्रले आयोजना गरेको प्रतियोगिता आज एक कार्यक्रमका बिच मुसिकोट नगरपालिकाका प्रमुख महेन्द्र केसीले उद्घाटन गर्नुभयो । यो प्रतियोगिता स्वर्गीय खेलाडी द्वय जनक शाह र सुधन श्रेष्ठको स्मृतिमा आयोजना गरिएको रुकुम पश्चिम भलिबल प्रशिक्षण केन्द्रका अध्यक्ष तेजविक्रम बिएमले जानकारी दिनुभयो ।
उहाँहरू दुवै जनाको २०७४ साल मङ्सिर ८ गते मुसिकोटको कानेवाङमा भएको गाडी दुर्घटनामा परी मृत्यु भएको थियो । उहाँको योगदान र स्मृतिमा प्रतियोगिता आयोजना गरिएको बिएमले बताउनुभयो । उहाँका अनुसार यो प्रतियोगिता अव देखि हरेक वर्ष आयोजना हुने छ ।
प्रतियोगितामा पुरुष तर्फ रुकुम पश्चिम, रुकुम पूर्व, रोल्पा, सल्यान, बागलुङ लगायत जिल्लाका २२ र महिला तर्फ रुकुम पश्चिम, सल्यान लगायत जिल्लाका ६ वटा टिमले सहभागिता जनाएका छन् । प्रतियोगिता आज उद्घाटन भएको र खेलहरू भने भोलीबाट सुरु हुने आयोजकले जनाएको छ ।
प्रतियोगिता अन्तर्गत पुरुष तर्फको विजेताले नगद १ लाख ५१ हजार, रनिङ्ग शिल्ड, कप, मेडल र प्रमाण–पत्र प्राप्त गर्ने अध्यक्ष बिएमले बताउनुभयो । उहाँका अनुसार उपविजेताले नगद १ लाख १ हजार, कप, मेडल र प्रमाण–पत्र पाउँदा तृतीय स्थान हासिल गर्ने टिमले नगद ५१ हजार कप, मेडल र प्रमाण–पत्र पाउने छन् ।
विभिन्न विधागत तर्फ पनि पुरस्कारको व्यवस्था गरिएको छ । वेस्ट प्लेयरले १५ हजार बराबरको स्मार्ट फोन पाउँदा, उदयमान खेलाडी, वेस्ट सेटर, वेस्ट ब्लकर, वेस्ट डिफेन्डर, वेस्ट स्पाइकर र वेस्ट सर्भरले समान २ हजार ५ सयका साथमा कप, मेडल र प्रमाण–पत्र पाउने आयोजकले जनाएको छ ।
त्यस्तै महिला तर्फको विजेताले नगद ५१ हजार, रनिङ्ग शिल्ड, कप, मेडल र प्रमाण–पत्र पाउने छ । उपविजेताले नगद ३१ हजार तथा तेस्रो हुने टिमले नगद २१ हजार कप, मेडल र प्रमाणपत्र पाउने बताइएको छ । महिलाको विधागत तर्फ वेस्ट प्लेयरले नगद ५ हजार तथा उदयमान खेलाडीले नगद २ हजार कप, मेडल र प्रमाण–पत्र पाउने अध्यक्ष बिएमले बताउनुभयो ।
त्यस्तै शिल्ड कब्जा गर्नका लागि भने एक टिमले लगातार तीन वर्ष उपाधि जित्नुपर्ने आयोजकले जनाएको छ । ‘विजेता टिमलाई नगद पुरस्कारका साथमा कप, मेडल र प्रमाणपत्रको व्यवस्था गरिएको छ, उहाँले भन्नुभयो–शिल्ड कब्जा गर्नका लागि भने लगातार तीन वर्ष विजेता बन्नुपर्ने हुन्छ ।’ खेल शुद्ध वडा स्तरीय रहेको छ भने २५ गतेसम्म सञ्चालन हुने छ ।
प्रतियोगिताको एक कार्यक्रमका बिच उद्घाटन गरिएको हो । रुकुम पश्चिम भलिबल प्रशिक्षण केन्द्रका अध्यक्ष तेजविक्रम विएमको अध्यक्षतामा भएको कार्यक्रममा मुसिकोट नगरपालिकाका प्रमुख महेन्द्र केसीको प्रमुख आतिथ्यता रहेको थियो । त्यस्तै कार्यक्रममा जिल्ला खेलकुद विकास समितिका कार्यालय सचिव लिलाप्रसाद ढकाल, नेपाली काँग्रेसका जिल्ला सह सचिव यज्ञ विष्ट, नेकपा एकीकृत समाजवादीका जिल्ला सचिव सुरज परियार, स्वर्गीय सुधन श्रेष्ठकी आमा गीता शाह श्रेष्ठ, स्वर्गीय जनक शाहकी दिदी टीका शाह लगायतको आतिथ्यता रहेको थियो । कार्यक्रमको सञ्चालन पत्रकार मनिष खड्काले गर्नुभएको थियो ।
