रुकुम पश्चिमको त्रिवेणी गाउँपालिका वडा नम्बर ९ का विभिन्न ठाउँमा गोरेटो बाटो सरसफाइ तथा मर्मत गरिएको छ । माँझगाउँ स्वास्थ्य आमा समूहले बर्सातको समयमा बिग्रिएको गोरेटो बाटो सरसफाइ तथा मर्मत गरेको हो । स्वास्थ्य आमा समूहले वडाको चौतारा, झालेढुङगा नुवाकोट डाँडा बजारसम्म बाटो सरसफाइ तथा मर्मत गरेको स्थानीय चूडामणि बस्नेतले जानकारी दिनुभयो । उहाँका अनुसार स्वास्थ्य आमा समूहले ३ किलोमिटर बाटो सरसफाइ तथा मर्मत गरेको हो । 

बाटोमा परेका खाल्डाखुल्डी पुर्नुका साथै बाटो वरपरको झाडी हटाइएको हो । यसमा स्थानीय युवाहरूको साथ रहेको उहाँको भनाई छ । चाडपर्व नजिकिएकाले स्थानीयलाई आवतजावतमा सहज होस भनेर बर्सातमा बिग्रिएको गोरेटो बाटो सरसफाइ तथा मर्मत गरिएको स्वास्थ्य आमा समूहले जनाएको छ । वडा कार्यालयले बाटो मर्मत गर्न चासो नदेखाएपछि समूहले बुधवार निर्णय गरेर शुक्रवार गोरेटो बाटो सरसफाइ तथा मर्मत गरेको स्थानीय बस्नेतले जानकारी दिनुभयो ।