रुकुम पश्चिमको मुसिकोट नगरपालिका वडा नम्बर १ खलङ्गाको एक होटेलमा महिला मृत फेला परेको घटनामा संलग्न भएको आरोपमा पक्राउ परेका आरोपीलाई प्रहरीले आज सार्वजनिक गर्ने भएको छ । त्यसका लागि जिल्ला प्रहरी कार्यालयले आज अपराह्न ४ बजे पत्रकार सम्मेलनको आयोजना गरेको छ । घटनामा संलग्न भएको आरोपमा प्रहरीले एक जनालाई पक्राउ गरेको छ । उक्त व्यक्तिलाई सार्वजनिक गर्न र घटनाका बारेमा जानकारी गराउन पत्रकार सम्मेलन आयोजना गरिएको जिल्ला प्रहरी प्रमुख प्रहरी नायव उपरीक्षक नमराज भट्टराईले जानकारी दिनुभयो ।

मुसिकोट नगरपालिका वडा नम्बर ७ कि २८ बर्सिया भावना विक मङ्गलवार बिहान खलङ्गाको सत्कार होटेलमा मृत फेला परेकी थिइन् । विकको घाँटी रेटेर हत्या गरिएको प्रहरीले जनाएको छ । घटनाको अनुसन्धानका लागि नेपाल प्रहरीको केनाइन कुकुर शाखा कोहलपुरबाट तालिमप्राप्त कुकुर सहितको टोलीले मङ्गलवार साँझ घटनास्थल पुगेर छानबिन गरेकाे थियो ।