रुकुम पश्चिमको त्रिवेणी गाउँपालिका वडा नम्बर ६ खारानेटामा विविध खेलकुद प्रतियोगिता सुरु भएको छ । आज एक कार्यक्रमका बिच खेलकुद प्रतियोगिताको त्रिवेणी गाउँपालिका अध्यक्ष गणेशकुमार केसीले उद्घाटन गर्नुभएको हो । वडा स्तरीय ब्याडमिन्टन, हाजिर जवाफ, एकल नृत्य लगायतका प्रतियोगिता आयोजना गरिएको कार्यक्रम संयोजक दिनेश विष्टले जानकारी दिनुभयो । उहाँका अनुसार ब्याडमिन्टन तर्फ प्रथम हुने टिमले नगद १२ हजार, द्वितीय हुने टिमले ८ हजार र तृतीय हुने टिमले ५ हजार रुपैयाँ सहित प्रमाण पत्र प्राप्त गर्ने छन् ।

यस्तै हाजिर जवाफ तर्फ प्रथम स्थान प्राप्त गर्नेले २ हजार ५ सय, दोस्रो स्थान प्राप्त गर्नेले १ हजार ५ सय र तेस्रो स्थान प्राप्त गर्ने समूहले ५ सय रुपैयाँ सहित प्रमाणपत्र प्राप्त गर्ने छ । यस्तै एकल नृत्यमा प्रथम हुनेलाई २ हजार दोस्रोलाई १ हजार ५ सय र तेस्रोलाई १ हजार पुरस्कार सहित प्रमाणपत्र रहेको संयोजक विष्टले जानकारी दिनुभयो । खेलकुद विकास समितिका सचिव विकल्प ओलीको अध्यक्षतामा भएको उद्घाटन कार्यक्रममा त्रिवेणी गाउँपालिका अध्यक्ष गणेशकुमार केसीको प्रमुख आतिथ्यता रहेको थियो ।

त्यस्तै त्रिवेणी गाउँपालिकाका  प्रमुख प्रशासकीय अधिकृत प्रेमबहादुर घर्तीको पनि आतिथ्यता रहेको थियो । कार्यक्रम व्यवस्थापन समितिका संयोजक दिनेश विष्टको स्वागत मन्तव्य रहेको कार्यक्रमको सञ्चालन खिमबहादुर ओलीले गर्नुभएको थियो ।