रुकुम पश्चिमको मुसिकोट नगरपालिका वडा नम्बर १ खलङ्गाको बराहटाकुरामा अवस्थित कवर्डहलमा दोस्रो वडाध्यक्ष कप खुला पुरुष डबल ब्याडमिन्टन प्रतियोगिता हुने भएको छ । मुसिकोट नगरपालिका वडा नम्बर २ को आयोजनामा प्रतियोगिता हुने भएको हो । प्रतियोगिता भोली र पर्सी गरी दुई दिन सञ्चालन हुने छ । 

भोली बिहान ८ बजेदेखि प्रतियोगिता सुरु हुने वडाध्यक्ष दिनेश खड्काले जानकारी दिनुभयो । प्रतियोगिताको विजेता जोडीले २५ हजार नगद, ट्रफि, मेडल र प्रमाणपत्र प्राप्त गर्ने छ । उप विजेता जोडीले १५ हजार नगद, ट्रफि, मेडल र प्रमाणपत्र प्राप्त गर्दा तेस्रो हुनेले ८ हजार, ट्रफि, मेडल र प्रमाणपत्र पाउने आयोजकले जनाएको छ । 

बडा दसैँको अवसरमा प्रतियोगिता आयोजना गरिएको हो । वडाले अघिल्लो वर्ष प्रथम वडाध्यक्ष कप अन्तर्गत भलिबल प्रतियोगिता सञ्चालन गरेको थियो । यो वर्ष भने ब्याडमिन्टन प्रतियोगिता आयोजना गरिएको वडाध्यक्ष खड्काले बताउनुभयो । उहाँका अनुसार वडामा राम्रो ब्याडमिन्टन कोर्ट नभएका कारण खलङ्गामा प्रतियोगिता आयोजना गर्नुपरेको हो ।