रुकुम पश्चिमको मुसिकोट नगरपालिका वडा नम्बर १ खलङ्गामा भएको दोस्रो वडाध्यक्ष कप पुरुष डबल ब्याडमिन्टन प्रतियोगिता सिद्धार्थ केसी र नवराज मल्लको जोडीले जितेको छ । मुसिकोट नगरपालिका वडा नम्बर २ ले आयोजना गरेको प्रतियोगिताको आज भएको फाइनलमा हरि केसी र हिरालाल केसीको जोडीलाई २–० को सोझो सेटमा पराजित गर्दै आठबीसकोटको सिद्धार्थ र नवराजको जोडी प्रथम भएको हो । उक्त जोडीले नगद २५ हजार, ट्रफि, मेडल र प्रमाणपत्र प्राप्त गरेको छ ।
फाइनलमा पराजित हरि र हिरालालको जोडीले नगद १५ हजार, ट्रफि, मेडल र प्रमाणपत्र पाएको आयोजक मुसिकोट नगरपालिका वडा नम्बर २ ले जनाएको छ । त्यस्तै ईश्वर रावल र कवीन्द्र पुनको जोडी तृतीय भएको छ । आजै तेस्रो स्थानका लागि भएको खेलमा रुकुमकोटको मदन बिसी र चिनु बिकको जोडीलाई पराजित गर्दै ईश्वर र कवीन्द्रको जोडी तृतीय भएको हो । यो जोडीले नगद ८ हजार, ट्रफि, मेडल र प्रमाणपत्र प्राप्त गरेको वडाध्यक्ष दिनेश खड्काले जानकारी दिनुभयो ।
प्रतियोगितामा रुकुम पश्चिम र पूर्वका ५२ जोडीले प्रतिस्पर्धा गरेका थिए । एक कार्यक्रमका बिच स्थान हासिल गर्ने जोडीलाई पुरस्कार वितरण गरिएको छ । मुसिकोट नगरपालिकाका प्रमुख महेन्द्र केसीले पुरस्कार वितरण गर्नुभयो । वडाध्यक्ष खड्काको अध्यक्षतामा समापन तथा पुरस्कार वितरण कार्यक्रम भएको थियो । वडा दसैँको अवसरमा प्रतियोगिता आयोजना गरिएको वडाध्यक्ष खड्काले बताउनुभयो । अघिल्लो वर्ष पहिलो वडाध्यक्ष कप अन्तर्गत भलिबल आयोजना गरिएकामा यो वर्ष ब्याडमिन्टन आयोजना गरिएको उहाँको भनाई छ ।
