रुकुम पश्चिमको मुसिकोट नगरपालिका वडा नम्बर १ र २ लाई जोड्ने बराहटाकुरा झोलुङ्गे पुल नजिकै पिङ सञ्चालनमा आएको छ । गत चैत महिनामा मापदण्ड नपुगेको भन्दै जिल्ला प्रशासन कार्यालयले पिङ बन्द गराएको थियो । पर्यटन मन्त्रालयबाट अनुमति पत्र लिएर विजया दशमीको अघिल्लो दिनदेखि पुनः पिङ सञ्चालन गरिएको सञ्चालक सानीभेरी गाउँपालिका वडा नम्बर ९ का इन्द्रबहादुर खड्काले जानकारी दिनुभयो । उहाँका अनुसार पिङ सञ्चालनको लागि मुसिकोट नगरपालिका, घरेलु तथा साना उद्योग कार्यालयमा पनि दर्ता गरिएको छ ।

पिङ सञ्चालनमा आएपछि पिङ खेल्न आउनेको सङ्ख्या पनि बढ्दै गएको उहाँको भनाई छ । दैनिक १५ देखि २० जना पिङ खेल्न आउने गरेको सञ्चालक खड्काको जानकारी दिनुभयो । पिङ खेले बापत एक जनाबाट १ सय रुपैयाँ लिने गरिएको छ । `साहसिक पर्यटन विकासमा टेवा पुर्‍याउने उद्देश्यले पिङ सञ्चालन गरिएको हो, पिङ निर्माण गर्दा हालसम्म १५ लाख जति खर्च भएको छ´ सञ्चालक खड्काले भन्नुभयो । उहाँका अनुसार एउटै संरचनामा दुई वटा पिङ रहेका छन् । दुई जनाले सँगै खेल्न मिल्ने एउटा पिङ छ भने अर्को पिङ सिङ्गल रहेको छ ।

पहिले केही कमी कमजोरी भएर पिङ बन्द भए पनि यस पटक भने आवश्यक सबै मापदण्ड पुरा गरेर तथा सबै सुरक्षा सतर्कता अपनाएर पिङ सञ्चालन गरिएको सञ्चालक खड्काले जानकारी दिनुभयो ।