रुकुम पश्चिमको मुसिकोट नगरपालिका वडा नम्बर १ कैलदेउमा सेभन ए साइड फुटबल प्रतियोगिता हुने भएको छ । हरियाली युवा क्लबको आयोजनामा दोस्रो 'दीपक स्मृति हरियाली गोल्ड कप' हुने भएको हो । खेल कार्तिक १९ गतेदेखि सुरु हुने आयोजकले जनाएको छ । प्रतियोगिताको विजेताले नगद ५० हजार ९ सय ९९ र उप विजेताले नगद २५ हजार ९ सय ९९ प्राप्त गर्ने आयोजक समितिका अध्यक्ष रोनिक्स बिसीले जानकारी दिनुभयो ।

उहाँका अनुसार विजेता र उप विजेता टिमलाई नगद सहित ट्रफि, मेडल र प्रमाणपत्र पनि प्रदान गरिने छ । प्रतियोगितामा सहभागिताका लागि कार्ड डिपोजिट सहित ६ हजार लाग्ने छ भने कार्तिक १८ गतेसम्म टिम दर्ता गर्न सकिने अध्यक्ष बिसीले बताउनुभयो । प्रतियोगितामा सहभागी हुने टिमले ३ जनासम्म जिल्ला बाहिरका खेलाडी राख्न पाइने आयोजकले जनाएको छ ।