कर्णाली प्रदेशका मुख्यमन्त्री राजकुमार शर्मा जाजरकोट केन्द्र बिन्दु भएर गएको भूकम्प प्रभावित क्षेत्रमा पुग्नु भएको छ । ४ जना चिकित्सकको टोली सहित हेलिकोप्टर मार्फत मुख्यमन्त्री शर्मा जारकोट हुँदै रुकुम पश्चिम पुग्नुभएको छ । जाजरकोट जिल्ला अस्पतालमा चिकित्सकको टोलीलाई छाडेर उहाँ रुकुम पश्चिमको आठबीसकोट नगरपालिकामा पुग्नुभएको हो । उहाँले आठबीसकोट नगर अस्पतालमा पुगेर बिरामीको अवस्थाका बारेमा जानकारी लिनुभएको छ ।

उहाँले उपचारमा लाग्न सबै स्वास्थ्यकर्मीहरुलाई आग्रह गर्नुभयो । त्यस्तै उद्धारमा खटिन उहाँले सुरक्षा निकाय, जनप्रतिनिधि, नेता कार्यकर्ता लगायत सबैलाई निर्देशन समेत दिनुभएको छ । अहिले प्रधानमन्त्री पुष्पकमल दाहाल प्रचण्ड आठबीसकोट नगरपालिको राडी आउँदै हुनुहुन्छ । त्यसपछि अन्य क्षेत्रमा प्रस्थान गर्ने मुख्यमन्त्री शर्माले जानकारी दिनुभयो । प्रधानमन्त्री प्रचण्ड आज बिहानै देखि जाजरकोट र रुकुम पश्चिमका भूकम्प प्रभावित क्षेत्रमा हुनुहुन्छ ।