जिल्ला प्रशासन कार्यालय रुकुम पश्चिमले प्रचार गरिएजस्ताे जिल्लामा राहत स्वरूप एक थानपनि सोलार सामग्री नआएको जनाएको छ । एक राष्ट्रिय दैनिक प्रत्रिकामा विभिन्न सहयोगी निकायबाट सङ्कलन गरी जाजरकोटका लागि पठाइएका ३ सय थान सोलार सामग्री बोकेको ट्रक पूर्व मन्त्री जनार्दन शर्माको निर्देशनमा रुकुम पुर्‍याई आठबीसकोट नगरपालिकामा वितरण गरिएको भनिएको थियो ।

यो समाचारले कार्यालयको गम्भीर ध्यानाकर्षण भएको जिल्ला प्रशासन कार्यालयले आज एक प्रेस विज्ञप्ति जारी गर्दै जनाएको छ । यसमा कुनै सत्यता नभेटिएकाे प्रशासनले जारी गरेको विज्ञप्तिमा उल्लेख छ । समाचारमा उल्लेखित सामग्रीको वितरणको सम्बन्धमा कार्यालयमा कुनै अभिलेख नरहेको प्रशासनले स्पष्ट पारेको छ ।

साथै सम्बन्धित स्थानीय तह आठविसकोट नगरपालिकाका प्रमुख र प्रमुख प्रशासकीय अधिकृतसँग बुझ्दा समेत उक्त सामग्री वितरण नभएको जानकारी आएको प्रमुख जिल्ला अधिकारी हरिप्रसाद पन्तले जारी गरेको विज्ञप्तिमा उल्लेख छ ।

जिल्लामा विभिन्न निकायबाट प्राप्त राहत सामग्रीहरूको वितरण जिल्ला प्रशासन कार्यालयमा अभिलेख राखी सम्बन्धित स्थानीय तहहरूमा वितरणका लागि पठाउने गरिएको समेत प्रशासनले स्पष्ट पारेको छ । प्रशासनले यस्ता भ्रामक समाचार सम्प्रेषण नगर्न भनेको छ भने सम्बन्धित निकायबाट आधिकारिकता बुझेर मात्र समाचार सम्प्रेषण गर्न भनेको छ ।