रुकुम पश्चिमको मुसिकोट नगरपालिका वडा नम्बर १ कैलदेउमा सञ्चालित दोस्रो दीपक स्मृति हरियाली गोल्ड कपको उपाधि एफ.सी. कलेक्सनले हात पारेको छ । फाइनलमा आयोजक हरियाली यूथ क्लबलाई २-१ ले पराजित गर्दै एफ.सी. कलेक्सनले उपाधि हात पारेको हो । 

प्रतियोगिताको विजेताले नगद ५० हजार ९ सय ९९ र उप विजेताले नगद २५ हजार ९ सय ९९ प्राप्त गरेको आयोजक हरियाली यूथ क्लबका अध्यक्ष रोनिक्स बिसीले जानकारी दिनुभयो । त्यस्तै विजेता र उप विजेता टिमलाई ट्रफि, मेडल र प्रमाणपत्र पनि प्रदान गरिएको छ ।

प्रतियोगितामा विभिन्न व्यक्तिगत विधामा पनि खेलाडी पुरस्कृत गरिएको छ । प्रतियोगिताको उत्कृष्ट खेलाडी एफ.सी. कलेक्सनका राजन विक घोषित भएका छन् । त्यस्तै सर्वाधिक गोलकर्ता आयोजक टिमका शिशिर गिरी, वेस्ट डिफेन्डर एफ.सी.कलेक्सनका विजय लामा, वेस्ट गोलकिपर एफ.सी. कलेक्सनका निर्मल सुनार र उदयमान खेलाडीको उपाधि आयोजक टिमका हेमराज बुढाथोकीले पाएका छन् ।