रुकुम पश्चिमका तीन वटा स्थानीय तहमा अस्थायी आवास निर्माणका लागि साढे दुई करोड रकम निकासा भएको छ । मङ्गलवार त्रिवेणी गाउँपालिकाको लागि रकम निकासा गरेको जिल्ला विपत् जोखिम न्यूनीकरण तथा व्यवस्थापन समितिले आज दुई वटा पालिकाको लागि रकम निकासा गरेको हो । आज सानीभेरी गाउँपालिका र आठबीसकोट नगरपालिकामा अस्थायी आवास निर्माण गर्न पहिलो किस्ता निकासा भएको जिल्ला विपत् जोखिम न्यूनीकरण तथा व्यवस्थापन समितिका संयोजक एवं प्रमुख जिल्ला अधिकारी हरिप्रसाद पन्तले जानकारी दिनुभयो । उहाँका अनुसार भूकम्प प्रभावित घरपरिवारलाई अस्थायी आवास निर्माण अनुदान कार्यविधि २०८० (दोस्रो संशोधन समेत) बमोजिम स्थानीय जोखिम न्यूनीकरण तथा व्यवस्थापन कोषमा रकम पठाइएको हो ।
मङ्गलवार त्रिवेणी गाउँपालिकामा ६४ जना लाभग्राहीको लागि १६ लाख रकम पहिलो किस्ता बापत पठाइएको थियो । आज आठबीसकोट नगरपालिकाका पाँच सय लाभग्राहीलाई पहिलो किस्ता बापत एक करोड २५ लाख र सानीभेरी गाउँपालिकामा चार सय ५० लाभग्राहीलाई अस्थायी आवास निर्माण गर्न एक करोड १२ लाख ५० हजार रकम पठाइएको सहायक प्रमुख जिल्ला अधिकारी प्रवेश बढुवालले जानकारी दिनुभयो ।
स्थानीय विपत् जोखिम न्यूनीकरण तथा व्यवस्थापन समितिबाट पहिचान भई जिल्लामा सिफारिस भएका लाभग्राहीलाई पहिलो किस्ता बापत प्रतिपरिवार २५ हजारका दरले रकम स्थानीय तहमा पठाइएको हो । स्थानीय तहबाट लाभग्राहीको पहिचान भई आएमा जिल्लाबाट धमाधम पहिलो किस्ता बापतको रकम पठाउने प्रबन्ध मिलाइएको बताइएको छ ।
पहिलो किस्ता बापतको रकम निकासा भएका पालिकाबाट पनि पूर्ण विवरण आइसकेको छैन । हालसम्म लाभग्राहीको पहिचान भएर आएका तिन स्थानीय तहका एक हजार १४ लाभग्राहीको लागि अस्थायी आवास निर्माण गर्न पहिलो किस्ता बापतको दुई करोड ५३ लाख ५० हजार रकम निकासा भएको छ ।
भूकम्पबाट घर क्षति भएकालाई सरकारले अस्थायी आवास निर्माणको लागि दुई चरणमा गरेर ५० हजार नगद राहत उपलब्ध बनाउने निर्णय गरिसकेको छ । जसका लागि सङ्घीय सरकारले जिल्ला विपत् जोखिम न्यूनीकरण तथा व्यवस्थापन कोषमा ५० करोड रकम पठाएको छ । गत कात्तिक १७ गते राती जाजरकोटको रामीडाँडा केन्द्र विन्दु बनाएर गएको छ दशमलव चार रेक्टर स्केलको भूकम्पले मानवीय सँगै भौतिक संरचनामा ठुलो क्षति पुर्याएको छ ।
