भूकम्पले घर भत्किएका परिवारलाई अस्थायी आवासका लागि रुकुम पश्चिममा आज एकै दिन झन्डै १९ करोड रुपैयाँ स्थानीय तहमा पठाइएको छ । पहिलो किस्ता बापत प्रति परिवार २५ हजारका दरले जिल्लाका आठबिसकोट नगरपालिका, चौरजहारी नगरपालिका र त्रिवेणी गाउँपालिकाका लागि १८ करोड ९२ लाख ७५ हजार पठाइएको जिल्ला विपत् जोखिम न्यूनीकरण तथा व्यवस्थापन समितिले जनाएको छ ।
आज एकै दिन आठबीसकोट नगरपालिकाका चार हजार, चौरजहारी नगरपालिकाका दुई हजार पाँच सय ११ र त्रिवेणी गाउँपालिकाका एक हजार ६० लाभग्राहीका लागि पहिलो किस्ता पठाइएको सहायक प्रमुख जिल्ला अधिकारी प्रवेश बढुवालले जानकारी दिनुभयो । उहाँका अनुसार आज सबैभन्दा बढी आठबिसकोटमा दश करोड, चौरजहारीमा ६ करोड २७ लाख ७५ हजार र त्रिवेणी गाउँपालिकामा दुई करोड ६५ लाख रकम गएको छ ।
आजको सहित अहिलेसम्म २१ करोड ४६ लाख २५ हजार रुपैयाँ स्थानीय तहमा गइसकेको छ । अहिलेसम्म सबैभन्दा बढी आठबिसकोट नगरपालिकामा चार हजार पाँच सय परिवारका लागि ११ करोड २५ लाख, चौरजहारी नगरपालिकामा दुई हजार पाँच सय ११ परिवारका लागि ६ करोड २५ लाख ७५ हजार, त्रिवेणी गाउँपालिकामा एक हजार एक सय २४ परिवारका लागि दुई करोड ८१ लाख र सानीभेरी गाउँपालिकामा चार सय ५० परिवारका लागि एक करोड १२ लाख ५० हजार पहिलो किस्ता बापत गएको बुढुवालको भनाई छ ।
तीन दिनमा जिल्ला भरमा गरेर आठ हजार पाँच सय ८५ लाभग्राहीलाई जिल्ला विपत् जोखिम न्यूनीकरण तथा व्यवस्थापन कोषबाट पहिलाे किस्ता स्थानीय विपत् जोखिम न्यूनीकरण तथा व्यवस्थापन कोषमा गएको छ । स्थानीय तहले लाभग्राही यकिन गरेर जिल्लामा पठाइरहेका छन् भने त्यसका आधारमा जिल्लाबाट धमाधम पहिलो किस्ता स्थानीय तहमा गइरहेको छ ।
स्थानीय तहले कोषमा आएको रकम धमाधम वितरण गरिरहेको बताएका छन् । त्रिवेणी गाउँपालिकाका हिजो ६४ परिवारलाई पहिलो किस्ता वितरण गरेको थियो । अन्य पालिकाले पनि पहिलो किस्ता दिन सुरु गरिसकेको जनाएको छन् ।
यसअघि एकै दिनमा स्थानीय तहमा गएकाे अनुदान १८ कराेड ९२ लाख ७५ हजार हुनुपर्नेमा अन्यथा भएकाेले सच्याइएकाे छ- सम्पादक
