गत कात्तिक १७ गते राती जाजरकोट रामीडाँडा केन्द्र विन्दु बनाएर गएको भूकम्पले रुकुम पश्चिमको चौरजहारी नगरपालिकामा क्षेति गरेका आठ हजार तीन सय ८३ लाभग्राही पहिचान भएका छन् । सोमबारसम्म नगरपालिकामा आठ हजार तीन सय ८३ लाभग्राही पहिचान भएका हुन् । लाभग्राहीको विवरण सङ्कलनको काम भने अझै जारी रहेकाले लाभग्राहीको सङ्ख्या बढ्न सक्ने चौरजहारी नगरपालिका निमित्त प्रमुख प्रशासकीय अधिकृत शेरप्रसाद ढकालले जानकारी दिनुभयो । उहाँका अनुसार १४ वटै वडाका विभिन्न ठाउँमा एक सय ९३ घर पूर्ण रूपमा ध्वस्त भएका छन् । 

आंशिक क्षति भए पनि बस्नै नमिल्ने गरी ६ हजार ८ सय ९९ घरमा क्षति पुगेको छ । सामान्य चर्केका घरहरूको सङ्ख्या एक हजार दुई सय २४ रहेको निमित्त प्रमुख प्रशासकीय अधिकृत ढकालले जानकारी दिनुभयो । सामान्य चर्केका घरहरू समेत गरेर हालसम्म नगरपालिकामा आठ हजार तीन सय ८३ लाभग्राही पहिचान भएको र ती लाभग्राहीको घर बनाउनुपर्ने देखिएको उहाँले जानकारी दिनुभयो । घर छोडेर टाढा गएकाहरू पनि आउने क्रम जारी रहेकाले लाभग्राहीको सङ्ख्या अझै बढ्ने नगरपालिकाले अनुमान गरेको छ । 

अस्थायी आवास निर्माण गर्न ६ हजार दुई सय ७९ लाभग्राहीको लागि पहिलो किस्ता बापत जिल्ला विपत् व्यवस्थापन कोषबाट नगरपालिकामा १५ करोड ६९ लाख ७५ हजार प्राप्त भएको छ । जसमध्ये चार हजार एक सय ९३ लाभग्राहीको खातामा १० करोड ४८ लाख २५ हजार रकम पठाएको नगरपालिकाले जनाएको छ ।