भूकम्प प्रभावित रुकुम पश्चिम र जाजरकोट लगायतका जिल्लामा खोप अभियान सुरु भएको छ । भूकम्प प्रभावित क्षेत्रमा रोगले महामारीको रूप लिन सक्ने जोखिमलाई मध्यनजर गर्दै दादुरा, रुबेला र टाइफाइड विरुद्धको खोप अभियान सुरु भएको हो । रुकुम पश्चिमका छ मध्ये तीन स्थानीय तहमा आजबाट खोप अभियान सुरु भएको स्वास्थ्य सेवा कार्यालय रुकुम पश्चिमले जनाएको छ । स्वास्थ्य सेवा व्यवस्थापक डाक्टर सुशील पोख्रेलले टाइफाइड रोग विरुद्धको खोप लगाएसँगै जिल्लामा खोप अभियान सुरु भएको स्वास्थ्य सेवा कार्यालयका खोप सुपरभाइजर अधिकृत कृष्णा खड्काले जानकारी दिनुभयो ।
आज मुसिकोट नगरपालिका, आठबिसकाेट नगरपालिका र चाैरजहारी नगरपालिकामा खोप अभियान सुरु भएको खड्काले बताउनुभयो । उहाँका अनुसार सानीभेरी, त्रिवेणी र बाँफिकाेट गाउँपालिकामा पौष ८ गते देखि खोप अभियान सुरु हुने छ । खोप अभियान पौष १४ गतेसम्म सञ्चालन हुने छ । आजबाट सुरु भएको मध्ये आठबिसकाेटमा पौष १३, मुसिकाेटमा पौष १४ र चाैरजहारीमा पौष ११ गतेसम्म तथा पौष ८ गतेबाट सुरु हुने मध्ये बाँफिकाेट गाउँपालिकामा पौष १३ गतेसम्म, सानीभेरी गाउँपालिकामा पौष १४ गतेसम्म र त्रिवेणी गाउँपालिकामा पौष १३ गतेसम्म खोप अभियान चल्ने खोप सुपरभाइजर अधिकृत खड्काले जानकारी दिनुभयो ।
दादुरा, रुबेला खोप ६ महिना देखि १५ वर्ष मुनीका सबै बालबालिकालाई लगाइने छ भने १६ देखि ४५ वर्ष उमेरका सबैलाई टाइफाइड विरुद्धको टि.सी.भी. खोप दिइने उहाँको भनाई छ । गर्भवती, ६ महिना सम्मका सुत्केरी र सिकिस्त बिरामीहरूलाई खोप नलगाइने उहाँले बताउनुभयो । यो अभियानमा नियमित खोप लगाउन छुट भएका ९ महिना देखि ५ वर्ष उमेर सम्मका बालबालिकाहरूलाई छुट खोप पनि दिइने बताइएको छ । भूकम्प पछिको समयमा दादुरा तथा टाइफाइडको सङ्क्रमण नफैलियाेस भनेर अभियानकै रूपमा खोप लगाउन लागिएको स्वास्थ्य सेवा कार्यालयले जनाएको छ ।
जिल्लामा यो हालसम्मकै ठुलो खोप कार्यक्रम रहेको बताइएको छ । यो अभियानबाट जिल्लाका एक लाख २४ हजार एक सय १५ जनालाई खोप लगाउने लक्ष राखिएको छ । यो जिल्लाको कुल जनसङ्ख्याको ८० प्रतिशत रहेको स्वास्थ्य सेवा कार्यालयले जनाएको छ । अभियानका लागि जिल्लामा तीन सय २० वटा खोप केन्द्र तोकिएको छ भने पाँच सय ४६ जना खोप लगाउने व्यक्ति र आठ सय ८५ जना स्वयंसेवक खटिँदै छन् ।
