सशस्त्र प्रहरी बल ४७ नम्बर गुल्म रुकुम पश्चिमले भूकम्प प्रभावित जिल्लाका विभिन्न ठाउँमा अस्थायी आवास निर्माण गरिरहेकाे छ । जिल्लाका चौरजहारी नगरपालिका, त्रिवेणी गाउँपालिका र मुसिकोट नगरपालिकामा सशस्त्रको टोली खटिएको छ । हालसम्म सशस्त्रले १४ वटा अस्थायी आवास निर्माण गरेको जानकारी दिएको छ । सशस्त्र प्रहरी निरीक्षक जालान्धर केसीका अनुसार चौरजहारी नगरपालिका र त्रिवेणी गाउँपालिकामा गरी १४ वटा अस्थायी आवास निर्माण गरिएको हो ।
चौरजहारी नगरपालिकामा ८ र त्रिवेणी गाउँपालिकामा ७ वटा अस्थायी आवास निर्माण गरिएको केसीले बताउनुभयो । चौरजहारीमा तेजबहादुर बटाला, तुलसा कामी, जयधरा खत्री, देवकी ओली, कृष्ण कामी, पानमती गिरी, एलिशा विक र पदमीकुमारी विककाे परिवारका लागि सशस्त्रले अस्थायी आवास बनाइदिएको हो । त्यस्तै त्रिवेणीमा धनसिंह खड्का, रुपा खड्का, विष्णुकुमारी ओली, लालसरी ओली, गणेशबहादुर खड्का र कबिराम ओलीकाे अस्थायी आवास निर्माण गरेको सशस्त्र प्रहरी निरीक्षक केसीले जानकारी दिनुभयो ।
वृद्ध वृद्धा, अपाङ्ग, एकल महिला, सुत्केरी महिला, बिरामी र विपन्न परिवारका लागि आवास बनाइदिएको उहाँको भनाई छ । उहाँका अनुसार अस्थायी आवास निर्माणका लागि चौरजहारीमा १५ जना, त्रिवेणीमा १० जना र मुसिकोटमा १० जनाको टोली खटिएको छ ।
