रुकुम पश्चिमको बाँफिकोट गाउँपालिकामा प्रमुख प्रशासकीय अधिकृत नहुँदा भूकम्प पीडितले अझै अस्थायी आवासका लागि पहिलो किस्ता पाउन सकेका छैनन् । जाजरकोटको रामीडाँडा केन्द्र विन्दु बनाएर भूकम्प गएको करिब दुई महिना पुग्न लाग्दा पनि बाँफिकोटमा अस्थायी आवास निर्माण गर्न पहिलो किस्ता पाउन नसकेका हुन् । जिल्ला विपत् व्यवस्थापन कोषबाट एक हजार ६ सय ९९ लाभग्राहीको लागि पहिलो किस्ता बापत २५ हजारका दरले चार करोड २४ लाख ७५ हजार रकम पठाइसकिएको छ ।
तर पालिकामा प्रमुख प्रशासकीय अधिकृत नहुँदा अहिलेसम्म पनि रकम निकासा सुरु हुन सकेको छैन । यसबारेमा सामान्य प्रशासन मन्त्रालयमा जानकारी गराइएको प्रमुख जिल्ला अधिकारी हरिप्रसाद पन्तले जानकारी दिनुभयो । प्रमुख प्रशासकीय अधिकृत दुर्गबहादुर ओली सुरुवा भएर गएपछि गाउँपालिका प्रमुख प्रशासकीय अधिकृत विहीन छ ।
यसबारेमा प्रशासन गम्भीर रहेको प्रमुख जिल्ला अधिकारी पन्तको भनाई छ । ‘प्रशासनको तर्फबाट हामीले गर्नुपर्ने भनेको सम्बन्धित निकायमा जानकारी गराउने नै हो । प्रमुख प्रशासकीय अधिकृत कहिले आउने, लाभग्राहीले किस्ता कहिलेसम्म पाउँछन् भनेर हामीले भन्न सक्ने कुरा भएन । यस विषयमा पालिकालाई नै थाहा होला’ उहाँले भन्नुभयो ।
बाँफिकोट गाउँपालिका उपाध्यक्ष तारा बुढा केसीले पहिले पालिकामा कार्यरत प्रमुख प्रशासकीय अधिकृतको अन्यत्रै सरुवा भएकाले लाभग्राहीलाई किस्ता दिन समस्या भएको बताउनुभयो । पालिकाले मन्त्रालयमा प्रमुख प्रशासकीय अधिकृत माग गरी पठाएको उहाँको भनाई छ । अख्तियारी आउन ढिला भएको उहाँले बताउनुभयो ।
मन्त्रालयबाट निमित्त प्रमुख प्रशासकीय अधिकृतलाई कामको जिम्मेवारी दिएर काम अगाडी बढाउन भनेकाले कार्यपालिकाको बैठक बसेर भोली नै निर्णय गर्ने उपाध्यक्ष बुढा केसीले जानकारी दिनुभयो । बाँफिकोट गाउँपालिकामा हाससम्म पहिलो किस्ता प्राप्त नगरे पनि आफ्नै खर्चमा एक सय १७ अस्थायी आवास निर्माण भएका छन् । ४० वटा अस्थायी आवास निर्माणको चरणमा रहेको गाउँपालिकाले जनाएको छ ।
