कर्णाली प्रादेशिक क्रिकेट सङ्घले प्रधानमन्त्री कप एक दिवसीय क्रिकेट प्रतियोगिताका लागि २० खेलाडीलाई बन्द प्रशिक्षणका लागि बोलाएको छ । सुर्खेतको वीरेन्द्रनगरमा पौष १० देखि १५ गतेसम्म सञ्चालन भएको छनौट प्रतियोगिताबाट सङ्घले २० जना खेलाडीलाई बन्द प्रशिक्षणमा बोलाएको हो । बन्द प्रशिक्षण पौष २३ गतेदेखि दाङको घोराहीमा सञ्चालन हुने कर्णाली प्रादेशिक क्रिकेट सङ्घले जनाएको छ ।

अहिलेलाई २० जना खेलाडीलाई बन्द प्रशिक्षणमा बोलाइएको र त्यसबाट टिम निर्माण हुने कर्णाली प्रादेशिक क्रिकेट सङ्घका सचिव श्रीधर केसीले जानकारी दिनुभयो । सङ्घले । रविन्द्रजंग शाही, निच्छल रावल, दिवान पुन, अर्जुन घर्ती, प्रकाश जैसी, दिनेश अधिकारी, अनुज चनरा, मनिष थापा, दिनेश रावत, विपिन शाही, दिपेन्द्र रावत, युनिसविक्रम सिंह, राजेश खड्का र हिमांशु शाहीलाई बन्द प्रशिक्षणका लागि बोलाएको छ ।

त्यस्तै विपिनप्रसाद शर्मा, मोहन केसी, आदित्यविक्रम शाह, सुनिल शाही, धनबहादुर केसी र विक्रम रोकालाई पनि सङ्घले बन्द प्रशिक्षणमा बोलाएको छ । बन्द प्रशिक्षणमा रुकुम पश्चिमका दुई जना खेलाडी परेका छन् । कर्णाली प्रदेशको तर्फबाट यसअघि नै विभिन्न राष्ट्रिय प्रतियोगिता खेलिसकेका अर्जुन घर्ती र पहिलो पटक धनबहादुर केसी बन्द प्रशिक्षणमा परेका हुन् । पिएम कप काठमाडौँ र भैरहवामा सञ्चालन हुन गइरहेको छ ।