रुकुम पश्चिमको सानीभेरी गाउँपालिका स्तरीय पाँचौँ राष्ट्रपति रनिङ शिल्ड राप्ती ज्ञानोदय माध्यमिक विद्यालय सिम्लीले हात पारेको छ । पालिका भित्रका १२ वटा विद्यालयलाई पछि पार्दै ज्ञानोदय माध्यमिक विद्यालयले शिल्ड हात पारेको हो । उसले ११ स्वर्ण, ४ रजत र ३ कांस्य गरी जम्मा १८ पदक सहित शिल्ड हात पारेको सानीभेरी गाउँपालिका प्रवक्ता पहलसिंह घर्तीले जानकारी दिनुभयो । यो सँगै राप्ती ज्ञानोदयले लगातार दोस्रो पटक शिल्ड जितेको छ ।

४ स्वर्ण, ४ रजत र १ कांस्य गरी ९ पदक प्राप्त गरेर जनप्रिय माध्यमिक विद्यालय हाँसिबाङ दोस्रो भएको छ । त्यस्तै ३ स्वर्ण, ५ रजत र ८ कांस्य गरी १६ पदक जितेर सूर्योदय माध्यमिक विद्यालय बेल्टापु तेस्रो स्थान प्राप्त गर्दा ३ स्वर्ण प्राप्त गर्दै नेपाल राष्ट्रिय माध्यमिक विद्यालय घापागारले सान्तवना स्थान प्राप्त गरेको छ । विद्यार्थीहरूले भलिबल, सट फुट, ज्याभलिङ थ्रो, छोटो तथा लामो दुरी एक सय मिटर देखि ३ हजार मिटर सम्मको दौड, लङ्ग जम्प, त्रिपल जम्प, रिले दौड र हाई जम्प लगायतका प्रतियोगितामा प्रतिस्पर्धा गरेका थिए ।

गत वर्षमा शिल्ड जितेको ज्ञानोदय माध्यमिक विद्यालयले यस वर्ष पनि शिल्ड जित्न सफल भएको छ । पुस १९ गतेदेखि ३ नम्बर वडाको वेल्टापु रङ्गशालामा सञ्चालन भएको शिल्ड आज सकिएको हो । त्रिवेणी गाउँपालिकाले यस अघि शिल्ड सञ्चालन गरिसकेको छ । भने बाँफिकोटमा आजबाट सुरु भएको छ । अन्य पालिकाहरूले पनि रनिङ शिल्ड सञ्चालनको तयारी गरिरहेका छन् ।