रुकुम पश्चिमको जिल्ला सदरमुकाम मुसिकोट नगरपालिका १ बराहटाकुरामा अवस्थित कवर्डहलमा खुला पुरुष ब्याडमिन्टन प्रतियोगिता सञ्चालन हुने भएको छ । रेड सञ्चार मिडिया एन्ड बहुउद्देश्यीय टेक्नोलोजी प्रालीले माघ ५ गते देखी ६ गतेसम्म खुला ब्याडमिन्टन प्रतियोगिता आयोजना गर्न लागेको हो ।
प्रतियोगितामा साबिक रुकुम जिल्ला (हालको रुकुम पश्चिम र पूर्व)का खेलाडीहरू सहभागी हुन पाउने रेड सञ्चार मिडिया एन्ड बहुउद्देश्यीय टेक्नोलोजी प्रालीका विशाल विष्टले जानकारी दिनुभयो । उहाँका अनुसार खेलमा सहभागिता जनाउनको लागि माघ ५ गते दिउँसो एक बजेसम्म टिम दर्ता गरिसक्नु पर्ने छ ।
प्रतियोगितामा प्रथम स्थान हासिल गर्ने जोडीले नगद २५ हजार सहित कप, मेडल र प्रमाणपत्र प्राप्त गर्ने छ । दोस्रो स्थान प्राप्त गर्ने जोडीले नगद १५ हजार सहित कप, मेडल र प्रमाणपत्र प्राप्त गर्दा सान्त्वना स्थान प्राप्त गर्ने दुई जोडीले नगद पाँच पाँच हजार सहित कप, मेडल र प्रमाणपत्र प्राप्त गर्ने विष्टले जानकारी दिनुभयो । दर्ता शुल्क एक हजार तोकिएको छ ।
