रुकुम पश्चिमको चौरजहारी नगरपालिकाले सडक क्षेत्र मिचेर संरचना निर्माण नगर्न नगरवासीलाई आग्रह गरेको छ । नगर भित्रका सडकहरूको वर्गीकरण गर्दै नगरपालिकाले तोकेको मापदण्ड विपरीत संरचना निर्माण नगर्न आग्रह गरेको हो । नगर कार्यपालिकाको असोज ३० गतेको बैठकले नगरभित्रका सडक खण्डहरूको मापदण्ड निर्धारण गरेको थियो । 

सोही मापदण्ड अनुसार सडक खण्डलाई ५ भागमा वर्गीकरण गरेर नगरवासीलाई सडक मिचेर संरचना निर्माण नगर्न सूचना मार्फत जानकारी गराइएको चौरजहारी नगरपालिकाका निमित्त प्रमुख प्रशासकीय अधिकृत शेरप्रसाद ढकालले जानकारी दिनुभयो । उहाँका अनुसार नगर भित्रका १४ वटै वडाका सडक क्षेत्रको वर्गीकरण गरिएको छ । 

क वर्गको सडक क्षेत्रमा ५० मिटर, ख वर्गको सडक क्षेत्रमा २२, ग वर्गको सडक क्षेत्रमा १४, घ  वर्गको सडक क्षेत्रमा १० र ङ  वर्गको सडक क्षेत्रमा ८ मिटर चौडाइमा संरचना निर्माण नगर्न भनिएको छ । वर्गीकरण गरेका विभिन्न ९३ वटा सडक खण्डको क्षेत्र मिचेर संरचना निर्माण नगर्न भनेको निमित्त प्रमुख प्रशासकीय अधिकृत ढकालले जानकारी दिनुभयो । 

स्थानीय सरकार सञ्चालन ऐन, २०७४ को दफा ४५ बमोजिम चौरजहारी नगरपालिकाले तोकेको मापदण्ड उलङ्घन गरी कतिपयले स्थायी वा अस्थायी आवास निर्माण गर्न थालेकोमा ध्यानाकर्षण भएको र मापदण्ड कार्यान्वयन गर्न सचेत गराएको हो । 

साथै भूकम्प प्रभावित परिवारहरूले सडक क्षेत्र मिचेर अस्थायी आवास निर्माण गरेको पाइएमा दोस्रो किस्ता बापतको अनुदान रकम समेत रोक्का हुने नगरपालिकाले चेतावनी दिएको छ । सडक खण्ड वर्गीकरण मापदण्ड वितरित संरचना निर्माण गरेमा उक्त संरचना हटाउन नगर प्रहरी, नेपाल प्रहरी समेत परिचालन गर्ने नगरपालिकाको चेतावनी छ । साथै उक्त संरचनाहरू हटाउँदा लाग्ने खर्चसमेत सम्बन्धित व्यक्ति तथा संस्थाबाट असुल उपर गरिने नगरपालिकाले जनाएको छ ।