चलचित्र ‘घरज्वाइँ’को टिमलाई रुकुम पूर्वको पुथाउत्तरगंगा गाउँपालिकाले स्वागत गरेको छ । छायाङ्कनको क्रममा पुगेको चलचित्रको टिमलाई गाउँपालिकाले आज तकसेरामा स्वागत गरेको हो । स्थानीय परम्परा अनुसार स्वागत गरिएको गाउँपालिकाले जनाएको छ । 

रुकुम पूर्वका विभिन्न ठाउँमा खिच्न लागिएको चलचित्र ‘घरज्वाइँ’को सुटिङ शनिबार रुकुम पूर्वको भूमे गाउँपालिका वडा नम्बर १ को लुकुमबाट सुरु भएको थियो । लकुम, काँक्रि र क्याङसी लगायतका ठाउँमा छायाँकन पछि आज ‘घरज्वाइँ’को टोली पुथाउत्तरगंगा गाउँपालिकाको तकसेरा पुगेको हो । 

उक्त टोलीलाई गाउँपालिकामा स्वागत गरिएको गाउँपालिका अध्यक्ष पुनिराज घर्तीको सचिवालयले जनाएको छ । यो टोली अबको केही दिन तकसेरा लगायतका ठाउँमा रहने चलचित्रका निर्देशक अनिल बुढाले जानकारी दिनुभयो । निर्देशक बुढा यही तकसेरावासी हुनुहुन्छ । जिल्लाका विभिन्न ठाउँमा चलचित्र ‘घरज्वाइँ’को छायाँकन हुने उहाँले बताउनुभयो । 

चलचित्रमा नायक दयाहाङ राई र मिरुना मगरको प्रमुख अभिनय रहेको छ । यसका अलावा चलचित्रमा फिल्ममा बुद्धि तामाङ, शिशिर वाङ्देल, पुस्कर गुरुङ,भोला सापकोटा, राज थापा काउचा, कविता आले, शिला आले, अनु थापा, बिना मगर, खड्गबहादुर पुन (खबपु) सोनाम लामा, विवेश बुढा, सुनील मगर लगायतलाई पनि देख्न सकिने छ । 

यस चलचित्रको निर्माता जनक घर्ती मगर रहनुभएको छ । यस चलचित्रको प्रदर्शन मिति आगामी असार २८ गतेलाई तोकिसकिएको छ । ३५ दिनको सुटिङका निर्माण तालिका बनाएर सुटिङ सुरु भएको हो ।