कर्णाली प्रदेशको राजधानी सुर्खेतको वीरेन्द्रनगरमा जारी प्रदेश राष्ट्रपति रनिङ शिल्ड अन्तर्गत रुकुम पश्चिम भलिबलमा छात्र छात्रा दुवै तर्फ फाइनल प्रवेश गरेको छ । आज भएको सेमिफाइनलमा आ–आफ्नो खेलमा विजयी हुँदै छात्र छात्रा दुवै टिम फाइनल प्रवेश गरेका हुन् । 

छात्र तर्फ रुकुम पश्चिमले सल्यानलाई पराजित गर्‍यो । आज बिहान भएको सेमिफाइनलमा सल्यानलाई ३–० को सोझो सेटमा पराजित गर्दै रुकुम पश्चिम फाइनल प्रवेश गरेको हो । आजै हुने फाइनलमा रुकुम पश्चिमले उपाधिका लागि कालिकोटसँग प्रतिस्पर्धा गर्ने प्रशिक्षक तेज बुढाले जानकारी दिनुभयो । 

उहाँका अनुसार छात्रा तर्फ रुकुम पश्चिमले सुर्खेतलाई पराजित गरेको हो । उक्त खेलमा पनि रुकुम पश्चिम ३–० को सोझो सेटमा विजयी भएको बुढाले बताउनुभयो । छात्रा तर्फ फाइनलमा रुकुम पश्चिमले सल्यानसँग प्रतिस्पर्धा गर्ने छ । छात्रा तर्फको फाइनल खेल पनि आजै हुने छ ।