रुकुम पश्चिमको सदरमुकाम मुसिकोट खलङ्गामा जारी महोत्सवमा आज पनि राष्ट्रिय तथा स्थानीय कलाकारहरूले प्रस्तुति राख्दै छन् । महोत्सवमा आज चर्चित गायक टङ्क तिमिल्सिना लगायतका कलाकार आउने सह आयोजक कला, संस्कृति, पर्यटन प्रवर्द्धन मञ्चका अध्यक्ष डिल्ली परियारले जानकारी दिनुभयो ।

उहाँका अनुसार तिमिल्सिना सहित गायक विजय तिरुवा लगायतका अन्य कलाकारहरूको पनि महोत्सवमा प्रस्तुति रहने छ । महोत्सवमा हिजो चर्चित गायक तथा मोडल रामजी खाँडले प्रस्तुति राख्नुभएको थियो । झरीका बाबजुद पनि महोत्सवमा उल्लेख्य सङ्ख्यामा दर्शक उपस्थित थिए ।

महोत्सव फागुन २८ गतेसम्म सञ्चालन हुने छ । महोत्सवमा चर्चित नायक तथा मोडल पल शाह सहित चर्चित हास्य कलाकार धुर्मुस–सुन्तली लगायतका कलाकार आउने आयोजकले जनाएको छ । रुकुम उद्योग वाणिज्य सङ्घको आयोजना र कला, संस्कृति, पर्यटन प्रवर्द्धन मञ्च रुकुम पश्चिमको सह आयोजनामा शुक्रवार देखि महोत्सव सुरु भएको हो ।