रुकुम पश्चिमको सदरमुकाम मुसिकोट खलङ्गामा जारी महोत्सवमा आज चर्चित गायिका एलिना चौहान आउनुहुने भएको छ । युवा पुस्तामा चर्चित चौहानले आज महोत्सवमा प्रस्तुति राख्ने सह आयोजक कला संस्कृति, पर्यटन प्रवर्द्धन मञ्चका अध्यक्ष डिल्ली परियारले जानकारी दिनुभयो । 

‘धोकेबाज’ गायिकाका रूपमा चर्चित चौहान पछिल्लो समय भने ‘कट्टा हान्दिन्छु’ भन्ने गीतका कारण चर्चित हुनुहुन्छ । केही वर्षदेखि सबैभन्दा व्यस्त गायिका चौहानले आज रुकुम पश्चिम महोत्सवमा दर्शकलाई मनोरञ्जन दिने परियारको भनाई छ । 

आज एलिना सहित अन्य ख्यातिप्राप्त कलाकारहरूको पनि प्रस्तुति रहने छ । प्रतिकुल मौसमका कारण महोत्सवमा अहिलेसम्म ठुलो सङ्ख्यामा दर्शकहरू आउन सकेका छैनन् । आज भने उल्लेख्य सङ्ख्यामा दर्शक आउने आयोजकले विश्वास लिएको छ । 

महोत्सव फागुन २८ गतेसम्म सञ्चालन हुने छ । महोत्सवमा चर्चित नायक तथा मोडल पल शाह सहित चर्चित हास्य कलाकार धुर्मुस–सुन्तली लगायतका कलाकार आउने आयोजकले जनाएको छ । रुकुम उद्योग वाणिज्य सङ्घको आयोजना र कला, संस्कृति, पर्यटन प्रवर्द्धन मञ्च रुकुम पश्चिमको सह आयोजनामा शुक्रवार देखि महोत्सव सुरु भएको हो ।